എടച്ചേരി: പുറമേരി കടത്തനാട് രാജാ ഫുട്‌ബോള്‍ അക്കാദമിയിലെ അഞ്ചു വനിതാ താരങ്ങള്‍ നാടിന് അഭിമാനമായി. സംസ്ഥാന ഫുട്‌ബോള്‍ ടീമില്‍ ഇടം നേടിയാണ് ഇവര്‍ നാടിന്റെ അഭിമാനതാരങ്ങളായി മാറിയത്. അണ്ടര്‍ 17 ലോകകപ്പ് ടീം സെലക്ഷന്റെ ഭാഗമായി തിരുവനന്തപുരം ചന്ദ്രശേഖരന്‍ നായര്‍ സ്റ്റേഡിയത്തില്‍ നടന്ന മത്സരത്തില്‍ നിന്നാണ് പുറമേരി കടത്തനാട് രാജാ ഫുട്‌ബോള്‍ അക്കാദമിയിലെ അഞ്ചു പേര്‍ക്ക് സെലക്ഷന്‍ ലഭിച്ചത്. കെ.പി അശ്വതി, ആര്യ കൃഷ്ണ, അശ്വതി എസ്. വര്‍മ്മ, എ.ടി.കെ അഞ്ജു, (ഗോള്‍ കീപ്പര്‍), കെ.നിസരി എന്നിവരാണ് സംസ്ഥാന ടീമില്‍ ഇടം നേടിയത്.
ബംഗളൂരുവിലും ഡല്‍ഹിയിലും നടക്കുന്ന രണ്ടും മൂന്നുംഘട്ട മത്സരങ്ങളില്‍ കേരളത്തെ പ്രതിനിധീകരിച്ച് ഇവര്‍ കളത്തിലിറങ്ങും. പുറമേരി കടത്തനാട് രാജാസ് ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥിനികളാണ് എല്ലാവരും.
ഊര്‍ജ്ജം 2017ന്റെ ആദ്യഘട്ട മത്സരമായിരുന്നു തിരുവനന്തപുരത്ത് നടന്നത്. പുറമേരി കടത്തനാട് രാജാ ഫുട്‌ബോള്‍ അക്കാദമിയിലെ കോച്ചുമാരായ സി. സൂരേന്ദ്രനും എം.കെ പ്രദീപുമാണ് ഇവര്‍ക്ക് പരിശീലനം നല്‍കിയത്. അഭിമാനനേട്ടം കൈവരിച്ച വിദ്യാര്‍ഥിനികളെയും പരിശീലകരെയും പുറമേരി കെ.ആര്‍ ഹയര്‍ സെക്കന്‍ഡറി സ്‌കൂള്‍ പി.ടി.എയും സ്റ്റാഫും അനുമോദിച്ചു.