ബയ്‌റൂത്ത്: ഇറാനെതിരായ യുദ്ധം പശ്ചിമേഷ്യയില്‍ പൊട്ടിത്തെറിയുണ്ടാക്കുമെന്ന് ലബ്‌നാനിലെ രാഷ്ട്രീയ-സായുധ സംഘടനയായ ഹിസ്ബുല്ല. ഇറാനെതിരായ യുദ്ധം അവിടെ ഒതുങ്ങില്ലെന്ന് യു.എസിനറിയാം. മേഖലയെ മുഴുവന്‍ അത് ചാമ്പലാക്കും. മേഖലയിലെ യു.എസിന്റെ താല്‍പര്യങ്ങളെയും സൈന്യത്തെയും ഒന്നാകെ അത് നശിപ്പിക്കുമെന്ന് ഹിസ്ബുല്ല തലവന്‍ ഹസന്‍ നസ്‌റുല്ല പറഞ്ഞു. സഊദിയിലെ മക്കയില്‍ ജി.സി.സി, ഒ.ഐ.സി, അറബ് ലീഗ് എന്നിവയുടെ അടിയന്തര യോഗം നടന്ന പശ്ചാത്തലത്തിലാണ് ഇറാന്‍ പിന്തുണയുള്ള ഹിസ്ബുല്ല തലവന്‍ ടെലിവിഷന്‍ പ്രസംഗത്തില്‍ ഇങ്ങനെ പറഞ്ഞത്. മേഖലയില്‍ ഇറാന്റെ സ്വാധീനം വര്‍ധിച്ചുവരുന്നുവെന്ന സഊദിയുടെ ആരോപണത്തെ തുടര്‍ന്നാണ് ഉച്ചകോടികള്‍ നടന്നത്. ഹിസ്ബുല്ലയെ യു.എസും യൂറോപ്യന്‍ യൂനിയനും ജി.സി.സിയും അറബ് ലീഗും ഭീകരപ്പട്ടികയില്‍ പെടുത്തിയതാണ്.