വടകര: ടി.പി വധക്കേസ് പ്രതി കിര്‍മാണി മനോജ് വിവാഹം ചെയ്തത് തന്റെ ഭാര്യയെ ആണെന്ന പരാതിയുമായി യുവാവ് രംഗത്ത്. വടകര നാരായണനഗരം സ്വദേശി ഷാനിഷാണ് വടകര പൊലിസില്‍ പരാതി നല്‍കിയിരിക്കുന്നത്. ഷാനിഷ് ഗള്‍ഫില്‍ നിന്ന് വരുന്നതിനു തൊട്ടു മുന്‍പ് യുവതി മക്കളേയും കൂട്ടി സ്വന്തം വീട്ടിലേക്ക് പോയിരുന്നു. വിവാഹ വാര്‍ത്ത കണ്ടാണ് പരാതിയുമായി യുവാവ് പൊലിസിനെ സമീപിക്കുന്നത്. യുവതി നിലവില്‍ തന്റെ ഭാര്യയാണെന്നും ഇക്കാര്യത്തില്‍ നിയമപരമായ നടപടി സ്വീകരിക്കണമെന്നുമാണ് പരാതിയില്‍ ആവശ്യപ്പെട്ടിരിക്കുന്നത്. അതിനിടെ, മക്കളെ കാണണമെന്ന ഷാനിഷിന്റെ ആവശ്യപ്രകാരം യുവതിയെയും കുട്ടികളെയും പൊലിസ് ഇന്നലെ സ്റ്റേഷനില്‍ വിളിച്ചുവരുത്തിയിരുന്നു. മക്കളെ മുന്‍ ഭര്‍ത്താവിന് കാണിച്ച ശേഷം യുവതി കുട്ടികളെയും കൂട്ടി മനോജിനൊപ്പം പോവുകയായിരുന്നു.
ബുധനാഴ്ചയായിരുന്നു കിര്‍മാണി മനോജ് എന്ന മാഹി പന്തക്കല്‍ മനോജ് കുമാറിന്റെ വിവാഹം. ടി.പി വധക്കേസില്‍ ജയിലില്‍ ജീവപര്യന്ത്യം തടവില്‍ കഴിയുന്ന മനോജ് പതിനൊന്ന് ദിവസത്തെ പരോളിലിറങ്ങിയാണ് വിവാഹം കഴിച്ചത്. പോണ്ടിച്ചേരിയില്‍ വച്ചായിരുന്നു വിവാഹം.