ആലപ്പുഴ: നിരോധിത ലഹരി മരുന്നുകളുടെ വില്‍പന പരിശോധിക്കാനെത്തിയ എക്‌സൈസ് സംഘത്തിനു നേരെ ആക്രമണം. ആലപ്പുഴ റെയ്ഞ്ച് എസ്.ഐ ഉള്‍പ്പടെ നാലുപേര്‍ക്കാണ് പരുക്കേറ്റത്. എക്‌സൈസ് റെയ്ഞ്ച് ഇന്‍സ്‌പെക്ടര്‍ അനീഷ്, പ്രിവന്റീവ് ഓഫിസര്‍ സുധീര്‍, സിവില്‍ ഓഫിസര്‍ വികാസ്, ഡ്രൈവര്‍ പ്രഭാത് എന്നിവര്‍ക്കാണ് പരുക്കേറ്റത്. ഇന്നലെ രാത്രിയാണ് സംഭവം.
ആലപ്പുഴ ബീച്ചിനു തെക്കുഭാഗത്തുള്ള കടയില്‍ ഹാന്‍സ് ഉള്‍പ്പടെയുള്ള നിരോധിത വസ്തുക്കള്‍ വില്‍പ്പന നടത്തുന്നതറിഞ്ഞ് പരിശോധനയ്ക്ക് എത്തിയതാണ് എക്‌സൈസ് സംഘം. ബിച്ചീന് തെക്കുവശത്തെ കടയില്‍നിന്ന് വിദ്യാര്‍ഥികള്‍ക്ക് നിരോധിത ലഹരി വസ്തുക്കള്‍ വില്‍ക്കുന്നത് എക്‌സൈസ് നേരിട്ട് പിടികൂടി. ഇതില്‍ പ്രകോപിതരായ കടയുടമയും ബന്ധുക്കളും ചേര്‍ന്ന് എക്‌സൈസുകാരെ വളഞ്ഞിട്ട് മര്‍ദിക്കുകയായിരുന്നു. പരുക്കേറ്റ നാലു ഉദ്യോഗസ്ഥരേയും ജനറല്‍ ആശുപത്രിയില്‍ പ്രവേശിപ്പിച്ചു. പ്രതികള്‍ക്കായുള്ള അന്വേഷണം പൊലിസ് ആരംഭിച്ചു.