കാര്‍ഡിഫ്: മുഹമ്മദ് നബിയുടെ സ്പിന്‍ മാന്ത്രികതയില്‍ തകര്‍ന്നടിഞ്ഞ് ശ്രീലങ്ക. മഴ തടസപ്പെടുത്തിയ മത്സരത്തില്‍ അഫ്ഗാനിസ്ഥാനെതിരേ 36.5 ഓവറില്‍ 201 റണ്‍സിന് ഓള്‍ഔട്ടായി. കളിയുടെ 33ാം ഓവറില്‍ മഴ പെയ്തതോടെ മത്സരം നിര്‍ത്തിവച്ചിരുന്നു. ശേഷം 41 ഓവറാക്കി ചുരുക്കിയാണ് മത്സരം ആരംഭിച്ചത്.

ടോസ് നേടിയ അഫ്ഗാനിസ്ഥാന്‍ ലങ്കയെ ബാറ്റിങിന് അയക്കുകയായിരുന്നു. മികച്ച തുടക്കത്തിന് ശേഷമാണ് ലങ്ക അഫ്ഗാന്‍ സ്പിന്‍ തന്ത്രത്തിന് മുന്നില്‍ കീഴടങ്ങിയത്. ബാറ്റിങ് തകര്‍ച്ച നേരിട്ട ലങ്കന്‍ നിരയില്‍ കുശാല്‍ പെരേര മാത്രമാണ് മെച്ചപ്പെട്ട സ്‌കോര്‍ കണ്ടെത്തിയത്. 81 പന്തില്‍ നിന്ന് പെരേര 78 റണ്‍സെടുത്തു. മധ്യനിരയിലെ നാല് താരങ്ങള്‍ രണ്ടക്കം കാണാതെ പുറത്തായി. അതില്‍ രണ്ട് പേര്‍ സംപൂജ്യരായിട്ടാണ് മടങ്ങിയത്. ക്യാപ്റ്റന്‍ ദിമുത് കരുണ രത്‌നെ 45 പന്തില്‍ നിന്ന് 30 റണ്‍സെടുത്തു.

അഫ്ഗാന്‍ ബൗളര്‍ മുഹമ്മദ് നബിയാണ് ലങ്കന്‍ ബാറ്റിങ്‌നിരയുടെ അടിവേരറുത്തത്. ഒന്‍പത് ഓവര്‍ എറിഞ്ഞ നബി 30 റണ്‍സ് വിട്ടുനല്‍കി നാല് വിക്കറ്റെടുത്തു. റാഷിദ് ഖാന്‍, ദൗലത് സദ്രാന്‍ എന്നിവര്‍ രണ്ട് വിക്കറ്റ് വീതവും വീഴ്ത്തി.