പൂനെ: ഇന്ത്യയുടെ ഷൂട്ടിങ് താരം ഗഗന്‍ നരംഗ് ലോക റെക്കോര്‍ഡ് മറികടന്ന പ്രകടനം പുറത്തെടുത്ത് വെള്ളി സ്വന്തമാക്കി. ജര്‍മനിയിലെ ഹന്നോവറില്‍ നടന്ന അന്താരാഷ്ട്ര ഷൂട്ടിങ് പോരാട്ടത്തിലാണ് 50 മീറ്റര്‍ റൈഫിള്‍ പ്രോണ്‍ വിഭാഗത്തില്‍ നരംഗ് ലോക റെക്കോര്‍ഡ് മറികടന്നത്. സ്വീഡന്റെ കള്‍ ഓള്‍സനാണ് സ്വര്‍ണം. ഓള്‍സന്‍ നിലവിലെ ലോക റെക്കോര്‍ഡ് മറികടന്ന് സ്വര്‍ണം സ്വന്തമാക്കുകയായിരുന്നു. നേരിയ വ്യത്യാസത്തിലാണ് നരംഗും ഓള്‍സനും ഒന്നും രണ്ടും സ്ഥാനം സ്വന്തമാക്കിയത്. നരംഗ് 250 പോയിന്റുകള്‍ വെടിവച്ചിട്ടപ്പോള്‍ ഓള്‍സന്‍ 250.1 പോയിന്റാണ് നേടിയത്.
അതേസമയം അന്താരാഷ്ട്ര ഷൂട്ടിങ് ഫെഡറേഷന്‍ നടത്തുന്ന മത്സരമല്ലാത്തതിനാല്‍ ഔദ്യോഗികമായ അംഗീകാരം ലോക റെക്കോര്‍ഡ് പ്രകടനങ്ങള്‍ക്ക് ലഭിക്കില്ല. ഈ വിഭാഗത്തില്‍ നിലവിലെ ദേശീയ റെക്കോര്‍ഡായി നരംഗിന്റെ പ്രകടനം പരിഗണിക്കപ്പെടും.