നിസാര്‍ കലയത്ത്

ജിദ്ദ: 40 ദിവസം നീണ്ടുനില്‍ക്കുന്ന ജിദ്ദ സീസണ്‍ ഫെസ്റ്റിവലില്‍ പങ്കെടുക്കുന്നതിനായി മൂന്ന് മിനുട്ടിനുള്ളില്‍ ഇ-ടൂറിസ്റ്റ് വിസ നല്‍കുമെന്ന് അധികൃതര്‍ വ്യക്തമാക്കി. സീസണ്‍ ഫെസ്റ്റിവലിലെ ഏതെങ്കിലും പരിപാടിക്ക് ടിക്കറ്റ് എടുത്തവര്‍ക്കാണ് ഇന്‍സ്റ്റന്റ് ഇ-ടൂറിസ്റ്റ് വിസ നല്‍കുകയെന്ന് ജിദ്ദ സീസണ്‍ ഫെസ്റ്റിവല്‍ ജനറല്‍ സൂപ്പര്‍വൈസര്‍ റെയിദ് അബു സൈനദ വ്യക്തമാക്കി.
എട്ട് മുതല്‍ ആരംഭിച്ച ജിദ്ദ സീസണ്‍ ഫെസ്റ്റിവല്‍ ജൂലൈ 18നാണ് സമാപിക്കുക.
എല്ലാ പ്രായത്തിലുമുള്ളവര്‍ക്കും കുടുംബത്തോടൊപ്പം പങ്കെടുക്കാവുന്ന തരത്തിലുള്ള വിനോദ പരിപാടികളാണ് ഉണ്ടാവുക. ടൂറിസം മറ്റൊരു പ്രധാന വരുമാന മാര്‍ഗമായി മാറ്റാനുള്ള ദീര്‍ഘകാല പദ്ധതിയുടെ ഭാഗമായാണ് ജിദ്ദ സീസണ്‍ ഫെസ്റ്റിവല്‍.
ഇന്‍സ്റ്റന്റ് ഇ-ടൂറിസ്റ്റ് വിസ ലഭിക്കുന്നതിനായി ഫെസ്റ്റിവലിലെ ഏതെങ്കിലും ഒരു പ്രോഗ്രാമിന്റെ ടിക്കറ്റ് ആവശ്യമാണ്. ടിക്കറ്റ് കൈവശപ്പെടുത്തുമ്പോള്‍ തന്നെ മൂന്ന് മിനുട്ടിനകം വിസ ലഭിക്കും.