ഉദയഗിരി: അരിവിളഞ്ഞ പൊയിലില്‍ തകര്‍ന്ന കലുങ്ക് നാട്ടുകാരുടെ നേതൃത്വത്തില്‍ നവീകരിച്ചു. മാസങ്ങളായി തകര്‍ന്നു കിടക്കുകയായിരുന്നു കലുങ്ക്.
അപകടാവസ്ഥയിലായതിനെത്തുടര്‍ന്ന് ഇതുവഴിയുള്ള വാഹന ഗതാഗതവും തടസപ്പെട്ടിരുന്നു. അരിവിളഞ്ഞ പൊയില്‍ വരെ സര്‍വിസ് നടത്തിയിരുന്ന ബസുകള്‍ കലുങ്ക് തകര്‍ന്നതിനെത്തുടര്‍ന്ന് ശാന്തിപുരത്ത് യാത്ര അവസാനിപ്പിക്കുകയായിരുന്നു.
ഇത് അരിവിളഞ്ഞ പൊയില്‍, ജോസ്ഗിരി, ജയഗിരി മേഖലയിലെ യാത്രക്കാര്‍ക്ക് ഏറെ ബുദ്ധിമുട്ടാണ് സൃഷ്ടിച്ചിരുന്നത്. ശാന്തിപുരത്ത് യാത്ര അവസാനിപ്പിക്കുന്ന യാത്രക്കാര്‍ രണ്ടു കിലോമീറ്ററിലധികം ദൂരം നടന്നുവേണം വീട്ടിലെത്താന്‍. സ്‌കൂള്‍ വിദ്യാര്‍ഥികളടക്കം നിരവധി യാത്രക്കാരാണ് ഇത്തരത്തില്‍ ദുരിതത്തില്‍പ്പെട്ടിരുന്നത്. ഇതിനെത്തുടര്‍ന്നാണ് അധികൃതരെ കാക്കാതെ നാട്ടുകാരുടെ നേതൃത്വത്തില്‍ കലുങ്ക് നവീകരിച്ചത്.