മുംബൈ: ഇന്ത്യന്‍ പ്രീമിയര്‍ ലീഗ് പ്ലേയോഫ് പോരാട്ടത്തിന് ഇന്ന് തുടക്കം. ഇന്ന് നടക്കുന്ന ക്വാളിഫയര്‍ ഒന്ന് പോരാട്ടത്തില്‍ മുംബൈ ഇന്ത്യന്‍സും റൈസിങ് പൂനെ സൂപ്പര്‍ ജയ്ന്റ് ഏറ്റുമുട്ടും. ലീഗ് റൗണ്ടില്‍ ഏറ്റവും സ്ഥിരത പുലര്‍ത്തിയ മുംബൈ മികച്ച ഫോമിലാണ്. അതേസമയം തുടക്കത്തില്‍ തപ്പിത്തടഞ്ഞ പൂനെ ഓരോ മത്സരം കഴിയും തോറും മികവ് പുലര്‍ത്തി രണ്ടാം സ്ഥാനക്കാരായാണ് ഇറങ്ങുന്നത്. ഇന്നത്തെ പോരാട്ടം വിജയിക്കുന്ന ടീം നേരിട്ട് ഫൈനലിലെത്തുമ്പോള്‍ തോല്‍ക്കുന്ന ടീമിന് ഒരവസരം കൂടി ലഭിക്കും.
നാല് തവണ നേര്‍ക്കുനേര്‍ ഏറ്റുമുട്ടിയപ്പോള്‍ മൂന്ന് തവണയും വിജയം സ്വന്തമാക്കിയതിന്റെ ആത്മവിശ്വാസം പൂനെയ്ക്കുണ്ട്. അതേസമയം ഈ സീസണിലെ ഏറ്റവും വിലപിടിച്ച താരമായ ബെന്‍ സ്റ്റോക്‌സിന്റെ അസാന്നിധ്യം പൂനെയ്ക്ക് ക്ഷീണമാണ്. അവസാന മത്സരത്തില്‍ ആറ് പേര്‍ക്ക് അവസരം നല്‍കി ഇറങ്ങിയ മുംബൈയുടെ പ്ലെയിങ് ഇലവനും പകരക്കാരുടെ ബഞ്ചും സുശക്തമാണ്.