ന്യൂഡല്‍ഹി: പൊടിക്കാറ്റിനെത്തുടര്‍ന്ന് ഡല്‍ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിന്റെ പ്രവര്‍ത്തനം ഒരുമണിക്കൂറോളം നിര്‍ത്തിവച്ചു. പൊടിക്കാറ്റിനെത്തുടര്‍ന്ന് ഡല്‍ഹി ദേശീയ തലസ്ഥാന പ്രദേശത്തെ താപനിലയില്‍ കുറവ് വന്നിട്ടുണ്ട്. തിങ്കളാഴ്ച 48 ഡിഗ്രി സെല്‍ഷ്യസായിരുന്നു താപനില. ഇന്നലെ വൈകിട്ട് 6.30ന് 40 ഡിഗ്രി സെല്‍ഷ്യസായിരുന്ന താപനില പൊടിക്കാറ്റിനെത്തുടര്‍ന്ന് ഏഴുമണിയോടെ 33 ഡിഗ്രിയിലേക്ക് കുറഞ്ഞതായി സ്‌കൈമെറ്റ് കാലാവസ്ഥാ നിരീക്ഷണ ഏജന്‍സി അറിയിച്ചു.ഗുജറാത്ത് തീരത്തേക്കടുക്കുന്ന വായു ചുഴലിക്കാറ്റിന്റെ സ്വാധീനവും താപനില കുറയാന്‍ കാരണമായതായി കാലാവസ്ഥാ നിരീക്ഷകര്‍ വ്യക്തമാക്കി. നാളെയോടെ വായു ചുഴലിക്കാറ്റ് ഗുജറാത്ത് തീരത്തു പതിക്കുമെന്നാണ് കരുതപ്പെടുന്നത്.