മങ്കട: പള്ളിപ്പുറം വെണ്ണക്കോട് നിവാസിയും, ചുങ്കത്തറ സി.എച്ച്.സിയിലെ ഫാര്‍മസിസ്റ്റമായ അബ്ദുല്‍ നാസര്‍ ആത്മഹത്യ ചെയ്യാനിടയായ സാഹചര്യം അതീവ ഗൗരവകരമായി കാണേണ്ട വിഷയമാണെന്ന് ടി.എ അഹമ്മദ് കബീര്‍ എം.എല്‍.എ.
അബ്ദുല്‍ നാസറിന്റെ സ്വദേശമായ വെണ്ണക്കോട് നിന്നും കുറഞ്ഞ ദൂരം മാത്രമുള്ള ആനക്കയം പി.എച്ച്.സിയില്‍ സമാന തസ്തികയില്‍ ഒഴിവ് ഉണ്ടായിട്ടും നിയമനം നല്‍കാത്തത് വകുപ്പ് തലത്തിലുള്ള രാഷ്ട്രീയ പ്രേരിതമായ ഇടപെടലാണെന്ന് വ്യാപകമായ പരാതി ഉണ്ട്.മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് നിര്‍ബന്ധിത പിരിവ് ചോദിച്ചും ഭരണാനുകൂല സര്‍വ്വീസ് സംഘടന നിരന്തരം മാനസികമായി പീഡിപ്പിച്ചതായും ആരോപണമുയര്‍ന്നതിനാല്‍ മരണം സംബന്ധിച്ച് സമഗ്രമായ അന്വേഷണം നടത്തി യാഥാര്‍ത്ഥ്യം വെളിച്ചത്തു കൊണ്ടുവരാന്‍ സര്‍ക്കാര്‍ തയ്യാറാകണമെന്ന് എം.എല്‍.എ ആവശ്യപ്പെട്ടു.
നാസര്‍ ആത്മഹത്യ ചെയ്യാനിടയായ സാഹചര്യം അതീവ ഗൗരവകരമായി എടുത്ത് ഒരു സമഗ്ര അന്വേഷണം നടത്തുവാന്‍ കേരളാ മുഖ്യമന്ത്രിയോടും, ആരോഗ്യ വകുപ്പ് മന്ത്രിയോടും ആവശ്യപ്പെട്ട് കത്ത് നല്‍കിയതായി എം.എല്‍.എ അറിയിച്ചു.