കൊട്ടാരക്കര: പുതിയ അധ്യയന വര്‍ഷം ആരംഭിക്കുമ്പോള്‍ വിദ്യാര്‍ഥികള്‍ക്ക് സുരക്ഷ ഒരുക്കാന്‍ മുന്നൊരുക്കങ്ങളുമായി കൊല്ലം റൂറല്‍ പൊലിസ് നടപടികള്‍ ആരംഭിച്ചതായി റൂറല്‍ ജില്ലാ പൊലിസ് മേധാവി എസ്. സുരേന്ദ്രന്‍ അറിയിച്ചു.
സ്‌കൂള്‍ വാഹനങ്ങളുടെ പരിശോധനയിലൂടെയാണ്  മുന്നൊരുക്കങ്ങള്‍ക്ക് തുടക്കം കുറിക്കുക. വാഹനം ഓടിച്ച് 10 വര്‍ഷം പരിചയമുള്ളവരെ മാത്രമേ ഡ്രൈവര്‍മാരായി നിയമിക്കാവൂ എന്ന് സ്‌കൂള്‍ അധികൃതര്‍ക്ക് നിര്‍ദേശം നല്‍കിയിട്ടുണ്ട്.
ഇവര്‍ മുന്‍കാലങ്ങളില്‍ വാഹനാപകടങ്ങള്‍ ഉണ്ടാക്കിയവരോ, കേസുകളില്‍ ഉള്‍പ്പെട്ടവരോ ആകാന്‍ പാടില്ല.
നിയമനത്തിന് മുമ്പ് ഇതു സംബന്ധിച്ച ക്ലിയറന്‍സ് സര്‍ട്ടിഫിക്കറ്റ് പൊലിസ് സ്റ്റേഷനില്‍ നിന്ന് വാങ്ങിയിരിക്കണം. മദ്യവും, മയക്കുമരുന്നുകളും ഉപയോഗിക്കുന്നവരെ നിയമിക്കാന്‍ പാടില്ല. അങ്ങനെ സംഭവിച്ചാല്‍ സ്‌കൂള്‍ അധികൃതരും കേസില്‍ പ്രതിയാകും. സ്‌കൂള്‍ അധികൃതര്‍ വാടകയ്ക്ക് എടുക്കുന്ന വാഹനങ്ങള്‍ക്കും ഈ നിബന്ധനകള്‍ ഉണ്ടായിരിക്കും.
വാഹനങ്ങളില്‍ വിദ്യാര്‍ഥികളെ കുത്തിനിറച്ചു പോകുന്നതു കണ്ടാല്‍ കര്‍ശന നടപടി ഉണ്ടാകും. പ്രായപൂര്‍ത്തിയാകാത്ത വിദ്യാര്‍ഥികള്‍ ഇരുചക്രവാഹനങ്ങള്‍ ഉപയോഗിച്ചാല്‍ അവര്‍ക്കും രക്ഷകര്‍ത്താക്കള്‍ക്കും എതിരേ നടപടി ഉണ്ടാകും.
 സ്‌കൂള്‍ പരിസരങ്ങളില്‍  മഫ്തി പൊലിസിന്റെ നിരീക്ഷണം ഉണ്ടാകും. ലഹരി വസ്തുക്കളുടേയോ പുകയില ഉല്‍പ്പന്നങ്ങളുടേയോ വില്‍പന സ്‌കൂള്‍ പരിസരങ്ങളില്‍ ഉണ്ടായാല്‍ കര്‍ശന നടപടികള്‍ ഉണ്ടാകും.
മുന്നൊരുക്കങ്ങളുടെ ഭാഗമായി കൊട്ടാരക്കര, പുനലൂര്‍ സബ്ബ് ഡിവിഷനിലെ സ്‌കൂള്‍ അധികൃതരുടെ യോഗം ഉടന്‍ ഉണ്ടാകും. തുടര്‍ന്ന് സ്‌കൂള്‍ ബസ് ഡ്രൈവര്‍മാരുടെ യോഗവും നടക്കും. സ്‌കുള്‍ തുറക്കുന്നത് മുതല്‍ സ്‌കൂള്‍ പരിസരങ്ങള്‍ പൊലിസിന്റെ നിരീക്ഷണത്തിലായിരിക്കും.