കോഴിക്കോട്: കെ.എം ഷാജി എം.എല്‍.എയെ എന്‍ഫോഴ്‌സ്‌മെന്റ് ചോദ്യം ചെയ്യല്‍ തുടരുന്നു. രാവിലെ പത്ത് മണിയോടെ ആരംഭിച്ച ചോദ്യം ചെയ്യലാണ് ഇപ്പോഴും തുടരുന്നത്. ഇന്നലെ ഷാജിയുടെ ഭാര്യയുടെയും ലീഗ് നേതാവ് ടി.ടി ഇസ്മായിലിന്റെയും മൊഴി ഇഡി രേഖപ്പെടുത്തിയിരുന്നു. ഷാജിയുടെയും ഭാര്യയുടെയും പേരിലുള്ള വസ്തുവകകളുടെ വിശദാംശങ്ങളും ബാങ്ക് ഇടപാടുകകളുടെ രേഖകളും ഇഡി ശേഖരിച്ചിട്ടുണ്ട്.
കല്‍പ്പറ്റയിലെ സ്വര്‍ണക്കടയില്‍ പങ്കാളിത്തം ഉണ്ടായിരുന്നു. ജനപ്രതിനിധി ആയശേഷം പങ്കാളിത്തം ഉപേക്ഷിച്ചെന്നും കെ.എ ഷാജി എന്‍ഫോഴ്‌സ്‌മെന്റിന് നല്‍കിയ മൊഴിയില്‍ പറയുന്നു. വീട് നിര്‍മാണത്തിന് ഭാര്യവീട്ടില്‍ നിന്ന് പണം നല്‍കിയിരുന്നു. രണ്ട് വാഹനം വിറ്റ പണവും വീട് നിര്‍മാണത്തിന് ഉപയോഗിച്ചതായും മൊഴിയിലുണ്ട്.

അഴീക്കോട് സ്‌കൂളില്‍ പ്ലസ്.ടു കോഴ്‌സ് അനുവദിക്കാന്‍ കോഴ വാങ്ങിയെന്ന പരാതിയില്‍ അഭിഭാഷകനൊപ്പമാണ് ഷാജി കോഴിക്കോട്ടെ ഇഡി ഓഫീസിലെത്തിയത്. ഷാജി ചോദ്യം ചെയ്യലുമായി സഹകരിക്കുന്നുണ്ടെന്ന് ഇ.ഡി ഉദ്യോഗസ്ഥര്‍ പറഞ്ഞു.