കൊച്ചി: അണ്ടര്‍ 17 ലോകകപ്പില്‍ കളിച്ച് മലയാളികളുടെ അഭിമാനമായി മാറിയ ഇന്ത്യന്‍ ആരോസ് താരം കെ.പി രാഹുല്‍ കേരള ബ്ലാസ്റ്റേഴ്‌സുമായി കരാറിലെത്തി. കഴിഞ്ഞ രണ്ട് സീസണിലും ഐ ലീഗില്‍ ഇന്ത്യന്‍ ആരോസിന് വേണ്ടി കളിച്ചിരുന്ന താരമാണ് രാഹുല്‍. കഴിഞ്ഞ സീസണില്‍ ഇന്ത്യന്‍ ആരോസിന്റെ മധ്യനിരയിലെ പ്രധാനതാരമായിരുന്നു രാഹുല്‍. സ്വന്തം നാടിന്റെ ടീമിന് വേ@ണ്ടി കളിക്കാന്‍ അവസരം കിട്ടിയതില്‍ അതിയായി സന്തോഷിക്കുന്നതായും ക്ലബിന്റെ ലക്ഷ്യത്തിനൊപ്പം മുന്നേറാന്‍ എല്ലാ പരിശ്രമങ്ങളും നടത്തുമെന്നും രാഹുല്‍ പറഞ്ഞു .സ്വന്തം ആരാധകരുടെ മുന്നില്‍ കളിക്കാനായി കാത്തിരിക്കുകയാണ്.

വിങ്ങര്‍ ആയും സ്‌ട്രൈക്കര്‍ ആയും ഒന്നിലധികം പൊസിഷനുകളില്‍ കളിക്കാന്‍ കഴിയുന്ന താരമാണ് രാഹുലെന്നും ഗോള്‍ നേടാനും അസിസ്റ്റ് ചെയ്യാനും കഴിയുന്ന നിശ്ചയ ദാര്‍ഢ്യമുള്ള കളിക്കാരനായി രാഹുലിനെ ഉപയോഗിക്കുമെന്നും പരിശീലകന്‍ എല്‍ക്കോ ഷറ്റോറി പറഞ്ഞു. അണ്ടര്‍ 17 ലോകകപ്പില്‍ ഇന്ത്യയുടെ ബാക്ക് നിരയിലും മധ്യനിരയിലും രാഹുല്‍ കഴിവ് തെളിയിച്ചിരുന്നു. രണ്ട് സീസണില്‍ ഐ ലീഗില്‍ കളിച്ചപ്പോള്‍ പലപ്പോഴും താരം പൊസിഷന്‍ മാറിയിരുന്നു. രണ്ട് പൊസിഷനിലും കളിക്കാന്‍ കഴിയുന്ന താരമെന്നതിനാല്‍ രാഹുല്‍ പരിശീലകരുടെ വിശ്വസ്തനായിരുന്നു.