കോഴിക്കോട്: അഴീക്കോട് സ്‌കൂളിലെ പ്ലസ്.ടു കോഴക്കേസില്‍ കെ.എം ഷാജി എം.എല്‍.എയുടെ ചോദ്യം ചെയ്യല്‍ പത്താം മണിക്കൂറില്‍. ഇന്നലെ പതിമൂന്നര മണിക്കൂറോളം അദ്ദേഹത്തെ ചോദ്യം ചെയ്തിരുന്നു. ഇന്ന് രാവിലെ പത്ത് മണിയോടെ ആരംഭിച്ച ചോദ്യം ചെയ്യല്‍ നടപടി രാത്രി വൈകിയും തുടരുകയാണ്.

അതേ സമയം അഴീക്കോട് സ്‌കൂളില്‍ നിന്ന് 25 ലക്ഷം കോഴ വാങ്ങിയെന്ന പരാതി ഷാജി ഇ.ഡി ഉദ്യോഗസ്ഥരോട് നിഷേധിച്ചു. കോഴിക്കോട് കോര്‍പറേഷനിലെ അദ്ദേഹത്തിന്റെ വീടിന് 1.62 കോടി രൂപ വില വരുമെന്ന് കോര്‍പ്പറേഷന്‍ ഇ.ഡിക്ക് റിപ്പോര്‍ട്ട് നല്‍കിയിരുന്നു. ഈ തുക എങ്ങനെ ലഭിച്ചുവെന്നാണ് ഇ.ഡിയുടെ ആദ്യ അന്വേഷണം.

വീട്ടില്‍ നിന്ന് 50 ലക്ഷവും, ഭാര്യവീട്ടില്‍ നിന്ന് 50 ലക്ഷവും വീട് വെക്കാന്‍ ലഭിച്ചുവെന്നാണ് ഷാജിയുടെ മൊഴി. 20 ലക്ഷം രൂപ സുഹൃത്ത് നല്‍കി. രണ്ട് കാര്‍ വിറ്റപ്പോള്‍ ലഭിച്ച 10 ലക്ഷവും വീട് നിര്‍മാണത്തിന് ഉപയോഗിച്ചെന്ന് ഷാജി ഇ.ഡിക്ക് നല്‍കിയ മൊഴിയില്‍ പറയുന്നു.

അഞ്ച് ജ്വല്ലറികളില്‍ ഓഹരി പങ്കാളിത്തം ഉണ്ടായിരുന്നു. ഇത് പിന്‍വലിച്ചപ്പോള്‍ കിട്ടിയ തുകയും ലോണ്‍ എടുത്ത തുകയും വീട് പൂര്‍ത്തിയാക്കാന്‍ എടുത്തുവെന്നും ഷാജി മൊഴി നല്‍കിയിട്ടുണ്ട്. എംഎല്‍എയുടെ വിദേശയാത്രകളെക്കുറിച്ചും ചോദിച്ചറിയുന്നുണ്ട്.