കോഴിക്കോട്: പ്ലസ്ടു കോഴക്കേസില്‍ മുസ്‌ലിംലീഗ് സംസ്ഥാന സെക്രട്ടറി കെ.എം ഷാജി എം.എല്‍.എക്കെതിരേ കുരുക്ക് മുറുക്കി എന്‍ഫോഴ്‌സ്‌മെന്റ് ഡയരക്ടറേറ്റ്. ഷാജിയെ വീണ്ടും ചോദ്യം ചെയ്യും. കോടികള്‍ വിലവരുന്ന വീടുകള്‍ നിര്‍മിക്കാന്‍ ഭാര്യാ വീട്ടുകാര്‍ സാമ്പത്തികമായി സഹായിച്ചുവെന്ന ഷാജിയുടെ മൊഴിയുടെ അടിസ്ഥാനത്തില്‍ ഭാര്യാപിതാവിലേക്കും അന്വേഷണം നീട്ടാനാണ് എന്‍ഫോഴ്‌സമെന്റ് ഡയരക്ടറേറ്റ് ആലോചിക്കുന്നത്. ചൊവ്വ, ബുധന്‍ ദിവസങ്ങളില്‍ മുഴുനീളെ ചോദ്യം ചെയ്യലാണ് നടന്നത്. ബുധനാഴ്ച രാത്രി രണ്ടുമണിയോടെയാണ് ചോദ്യം ചെയ്യല്‍ പൂര്‍ത്തിയായത്. കോഴിക്കോട്ട് 1.62 കോടി ചെലവിലും കണ്ണൂരില്‍ 28 ലക്ഷത്തിനും ഷാജി നിര്‍മിച്ച വീടുകള്‍ക്കാവശ്യമായ പണം വന്നതിന്റെ ഉറവിടമാണ് ഇ.ഡി അന്വേഷിക്കുന്നത്.
കുറച്ചു രേഖകള്‍ കൂടി ഹാജരാക്കാന്‍ ഉണ്ടെന്ന് ചോദ്യം ചെയ്യലിനിടെ കെ.എം ഷാജി അറിയിക്കുകയായിരുന്നു. ഇതിനായി പത്തു ദിവസം അനുവദിച്ചു. തെരഞ്ഞെടുപ്പ് ചെലവടക്കമുളള എല്ലാകാര്യങ്ങളും ഇ.ഡി ചോദിച്ചതായാണ് വിവരം. ചൊവ്വാഴ്ച നടന്ന ചോദ്യം ചെയ്യലും പന്ത്രണ്ടു മണിക്കൂറോളം നീണ്ടിരുന്നു.