തൃപ്രങ്ങോട്: ഭാരതപ്പുഴയില്‍ അനധികൃത തോണികള്‍ ഒഴുകി നടക്കുന്നു. മണല്‍ കടത്തിനും മത്സ്യ ബന്ധനത്തിനും മറ്റുമായി ധാരാളം അനധികൃത വഞ്ചികളാണ് നിളയില്‍ കടത്ത് നടത്തുന്നത്. ചമ്രവട്ടം, പുറത്തൂര്‍, തൃപ്രങ്ങോട്, കുറ്റിപ്പുറം, തവനൂര്‍ ഭാഗങ്ങളിലാണ് തോണികള്‍ പുഴയില്‍ കാണപ്പെടുന്നത്.
ഇതിനു പുറമെ പുഴയില്‍ വറ്റിവരണ്ട സ്ഥലങ്ങളില്‍ പന്ത് കളിക്കുന്നതിന് വൈകുന്നേരങ്ങളില്‍ ധാരാളം പേരാണ് തോണിയില്‍ എത്തുന്നത്. ചെറിയ കുട്ടികളടക്കം നിരവധി പേരെ കുത്തിനിറച്ചാണ് അനധികൃത തോണികള്‍ പുഴയുടെ ആഴമേറിയ ഭാഗങ്ങളിലൂടെ കടന്ന് പോകുന്നത്. ഇത് വലിയ ജലദുരന്തത്തിന് വഴിവെച്ചേക്കുമെന്നും പൊലിസ് -റവന്യൂ വകുപ്പുകള്‍ ഭാരതപ്പുഴയില്‍ പരിശോധന നടത്തി അനധികൃത തോണികള്‍ പിടിച്ചെടുക്കണമെന്നും നാട്ടുകാര്‍ ആവശ്യപ്പെടുന്നു.