മാവൂര്‍: പ്രാവുകള്‍ കൂട്ടത്തോടെ ചത്തൊടുങ്ങി. മാവൂര്‍ പാടത്ത് പാട്ടാപ്പില്‍ താഴത്ത് നെല്‍കൃഷിക്കായി വിത്തിറക്കിയ കാരിക്കുട്ടിയുടെ കൃഷിയിടത്തിലാണ് ഒന്‍പത് പ്രാവുകള്‍ ചത്തുവീണത്. ഇവിടുത്തെ നെല്‍മണികള്‍ കഴിച്ചതാകാം പ്രാവുകള്‍ ചത്തതിനു കാരണമെന്ന് കരുതുന്നു. ഇവിടെ പ്രാണികളും കൂട്ടത്തോടെ ചത്തിട്ടുണ്ട്.
നാട്ടുകാര്‍ വിവരമറിയിച്ചതിനെ തുടര്‍ന്ന് മാവൂര്‍ പൊലിസ് സ്ഥലത്തെത്തി അന്വേഷണം നടത്തുകയും വനംവകുപ്പ് അധികൃതരെ വിവരമറിയിക്കുകയും ചെയ്തു. ഫോറസ്റ്റ് ഉദ്യേഗസ്ഥര്‍ ചത്ത പ്രാവുകളെ ശേഖരിച്ച് കൊണ്ടുപോയിട്ടുണ്ട്. ഇന്ന് താമരശേരി മൃഗാശുപത്രിയില്‍ ഇവയെ പോസ്റ്റ്‌മോര്‍ട്ടത്തിനു വിധേയമാക്കും.
ഗ്രാസിമിന്റെ ഉടമസ്ഥതയിലുള്ള ഈ വയലുകളില്‍ പ്രദേശത്തെ കര്‍ഷകര്‍ കൃഷിയിറക്കുന്നത് തടയാന്‍ ആരോ മനപൂര്‍വം വിഷം വച്ചതാകാമെന്നും സംശയിക്കുന്നുണ്ട്.