ജിദ്ദ: റിയാദില്‍ വ്യാപാര സ്ഥാപനത്തില്‍ ആയുധങ്ങളുമായി എത്തി അക്രമികള്‍ പണം കവര്‍ന്നു. മാരകായുധങ്ങളുമായി എത്തിയ രണ്ടംഗ സംഘം സ്ഥാപനത്തില്‍ ഉണ്ടായിരുന്ന മലയാളികളെ വെട്ടിപ്പരുക്കേല്‍പിച്ചാണ് മടങ്ങിയത്. ബത്ഹയിലെ ഒരു മത്സ്യവില്‍പന കേന്ദ്രത്തില്‍ ഞായറാഴ്ച ഉച്ചയ്ക്ക് 2.30ഓടെയായിരുന്നു സംഭവം. സ്ഥാപനത്തില്‍ ജോലി ചെയ്തിരുന്ന മലപ്പുറം സ്വദേശി ബാവ, ഇവിടെ മറ്റ് ജോലിക്കായി എത്തിയ വേങ്ങര സ്വദേശി ശശി എന്നിവര്‍ക്കാണ് പരുക്കേറ്റത്.
രണ്ട് അറബി യുവാക്കളാണ് കടയിലേക്ക് കയറിവന്നത്. കത്തിയും വടിവാളും വീശി ജീവനക്കാരോട് പണവും മൊബൈല്‍ ഫോണും ആവശ്യപ്പെടുകയായിരുന്നു. പണം എടുക്കാന്‍ ശ്രമിക്കവേ ബാവയെ കത്തികൊണ്ട് തലയില്‍ അടിക്കുകയും ചെയ്തു. പഴ്‌സ് എടുത്ത് അക്രമികള്‍ക്ക് കൊടുത്തെങ്കിലും അതില്‍ പണം കുറവായിരുന്നതിനാല്‍ കത്തികൊണ്ട് തലയില്‍ വീണ്ടും വെട്ടി.
സംഭവം കണ്ടുകൊണ്ട് നില്‍ക്കുകയായിരുന്ന ശശിയും പേടിച്ച് പഴ്‌സ് അക്രമികള്‍ക്ക് കൊടുത്തു. ഇതിനിടെ ശശിയേയും കത്തികൊണ്ട് അടിച്ചു. ഇവരിരുവരുടേയും മൊബൈല്‍ ഫോണുകളും പിടിച്ചുവാങ്ങി സംഘം രക്ഷപ്പെടുകയായിരുന്നു. സംഭവം കടയിലെ സി.സി.ടി.വി കാമറ ദൃശ്യത്തില്‍ പതിഞ്ഞിട്ടുണ്ട്.