ഇടുക്കി: മൂന്നാര്‍ ട്രൈബ്യൂണല്‍ കെട്ടിടം ആക്രമിച്ചതിന് എസ്.രാജേന്ദ്രന്‍ എം.എല്‍.എക്കെതിരെ കേസെടുത്ത എസ്.ഐയെ സ്ഥലം മാറ്റി. എസ്.ഐ കെ.ജെ വര്‍ഗീസിനെയാണ് സ്ഥലം മാറ്റിയത്. മൂന്നാറില്‍ നിന്ന് കട്ടപ്പനയിലേക്കാണ് സ്ഥലം മാറ്റം.

മൂന്നാറിലെ ഭൂമി കയ്യേറ്റക്കേസുകള്‍ കൈകാര്യം ചെയ്യുന്ന മൂന്നാര്‍ സ്‌പെഷല്‍ ട്രൈബ്യൂണല്‍ കോടതി കെട്ടിടത്തില്‍ സി.പി.എം എം.എല്‍.എ എസ്. രാജേന്ദ്രനും സംഘവും അതിക്രമിച്ചു കറിയതിനാണ് കേസെടുത്തിരുന്നത്. തഹസില്‍ദാര്‍ക്കെതിരെയും കേസുണ്ടായിരുന്നു.

അതേസമയം, സ്ഥലം മാറ്റം ശിക്ഷാ നടപടിയല്ലെന്നാണ് പൊലിസ് നല്‍കുന്ന വിശദീകരണം.

കഴിഞ്ഞ മാസം മലയിടിച്ചിലില്‍ തകര്‍ന്ന മൂന്നാര്‍ സര്‍ക്കാര്‍ കോളജ് താല്‍ക്കാലികമായി പ്രവര്‍ത്തിക്കാന്‍, സ്‌പെഷല്‍ ട്രൈബ്യൂണല്‍ കെട്ടിടം വിട്ടുകിട്ടണമെന്നാവശ്യപ്പെട്ടാണ് എം.എല്‍.എയും സംഘവും എത്തിയത്. കോളജ് പ്രവര്‍ത്തിപ്പിക്കുന്നതിനുള്ള സാധ്യത തേടി എത്തിയ സംഘം കോടതിമുറിയില്‍ അതിക്രമിച്ച് കയറി ക്ലാസെടുക്കാന്‍ ആരംഭിച്ചു. ഈ ദൃശ്യങ്ങള്‍ പകര്‍ത്തിയ കോടതി ജീവനക്കാരന്‍ സുമി ജോര്‍ജിനെ സംഘാംഗങ്ങള്‍ മര്‍ദിക്കുകയും ദൃശ്യങ്ങള്‍ മായ്ച്ചു കളയുകയും ചെയ്തിരുന്നു.തുടര്‍ന്നാണ് പൊലിസ് രാജേന്ദ്രനെ ഒന്നാം പ്രതിയും പി.വി ഷാജിയെ രണ്ടാം പ്രതിയുമാക്കി കേസെടുത്തത്.