തിരുവനന്തപുരം: പട്ടികജാതി, പട്ടികവര്‍ഗ വിഭാഗത്തില്‍പ്പെട്ടവരുടെ പ്രശ്‌നങ്ങളില്‍ ഇടപെടുന്നതിനും പരിഹരിക്കുന്നതിനും സര്‍ക്കിള്‍ ഇന്‍സ്‌പെക്ടര്‍ തലത്തില്‍ രൂപീകരിച്ചിരുന്ന സംവി ധാനം ഇനിമുതല്‍ സബ് ഡിവിഷന്‍ തലത്തില്‍ പ്രവര്‍ത്തിക്കുമെന്ന് ഡി.ജി.പി ലോക്‌നാഥ് ബെഹ്‌റ അറിയിച്ചു.
ഡിവൈ.എസ്.പിയായിരിക്കും ഇനിമുതല്‍ സമിതിയുടെ അധ്യക്ഷന്‍. അദ്ദേഹത്തിന്റെ അധികാരപരിധിയിലുള്ള സ്റ്റേഷന്‍ ഹൗസ് ഓഫിസര്‍മാര്‍, പട്ടികജാതി, പട്ടികവര്‍ഗ വിഭാഗത്തില്‍പ്പെട്ട പ്രമുഖര്‍, ഈ വിഭാഗത്തിലെ സംഘടനകളുടെ പ്രതിനിധികള്‍, സന്നദ്ധസംഘടനകളുടെ പ്രതിനിധികള്‍ എന്നിവര്‍ അംഗങ്ങളായിരിക്കും. കമ്മിറ്റി മൂന്ന് മാസത്തിലൊരിക്കല്‍ യോഗം ചേരും.
യോഗത്തിന്റെ തീരുമാനം ജില്ലാ ക്രൈം റെക്കോര്‍ഡ്‌സ് ബ്യൂറോയുടെ ചുമതലയുള്ള ഡിവൈ.എസ്.പിക്കോ അസിസ്റ്റന്റ് കമ്മിഷണര്‍ക്കോ ആണ് നല്‍കേണ്ടത്.
പൊലിസില്‍ സര്‍ക്കിള്‍ ഓഫിസ് സംവിധാനം ഉപേക്ഷിക്കുകയും ഇന്‍സ്‌പെക്ടര്‍മാരെ സ്റ്റേഷന്‍ ഹൗസ് ഓഫിസര്‍മാരായി നിയോഗിക്കുകയും ചെയ്ത സാഹചര്യത്തിലാണ് പുതിയ തീരുമാനം.