റിയാദ്: സഊദിയിലുടനീളം സൗജന്യ വൈഫൈ ഹോട്ട്​സ്​പോട്ടുകൾ വരുന്നു. ഏവർക്കും ഇന്റർനെറ്റ് സൗജന്യമായി നൽകി ജീവിത നിലവാരം മെച്ചപ്പെടുത്തുന്നതിന്റെ ഭാഗമായാണ് സഊദി കമ്യൂണിക്കേഷൻസ്​ ആൻഡ്​​ ഇൻഫർമേഷൻ ടെക്​നോളജി കമീഷൻ പുതിയ പദ്ധതി ആവിഷ്‌കരിച്ചത്. വിവിധ ഘട്ടങ്ങളിലായി രാജ്യത്താകമാനം 60,000 വൈഫൈ ഹോട്ട്​സ്​പോട്ടുകൾ സ്ഥാപിക്കാനുള്ള പദ്ധതിയുടെ പ്രാരംഭ നടപടികൾ തുടങ്ങിക്കഴിഞ്ഞിട്ടുണ്ട്. പ്രതിദിനം രണ്ട്​ മണിക്കൂർ വരെ വൈഫൈ സൗജന്യമായി​ നൽകുന്നതുൾപ്പെടെയുള്ള പദ്ധതിയാണ് നടപ്പിലാക്കുന്നത്.

     ആശുപത്രികൾ, ഇരു ഹറമുകൾ, പുണ്യസ്ഥലങ്ങൾ, മാളുകൾ, പൊതുപാർക്കുകൾ എന്നിവയടക്കമുള്ള കേന്ദ്രങ്ങളിലാണ് സൗജന്യ ഇന്റർനെറ്റ് വൈഫൈ സ്ഥാപിക്കുക. സാമ്പത്തിക പരിവർത്തനം സാധ്യമാക്കാനും വിഷൻ 2030 ലക്ഷ്യം കൈവരിക്കാനും പ്രധാന സ്​തംഭങ്ങളിലൊന്നാകാൻ ഡിജിറ്റൽ പരിവർത്തനത്തിന്​ കഴിഞ്ഞതായി കമ്യൂണിക്കേഷൻസ്​ ആൻഡ്​​ ഇൻഫർമേഷൻ ടെക്​നോളജി കമീഷൻ ഗവർണർ ഡോ: മുഹമ്മദ്​ ബിൻ സഊദ് അൽതമീമി പറഞ്ഞു. ആശയ വിനിമയ, വിവര സാങ്കേതിക സേവനങ്ങൾ ശക്തിപ്പെടുത്തുകയും പ്രോത്സാഹിപ്പിക്കുകയും ചെയ്യാനാണ്​​ പുതിയ പദ്ധതിയെന്നും ഗവർണർ ചൂണ്ടിക്കാട്ടി.

    രാജ്യത്തെ ഇന്റർനെറ്റ് സേവന ധാതാക്കളുമായി സഹകരിച്ച് നടപ്പാക്കുന്ന പദ്ധതി കമ്പനിയുടെ വെബ്​സൈറ്റിലോ ആപ്ലിക്കേഷനിലോ ഉപയോക്താക്കൾക്ക്​ കാണാൻ കഴിയുന്ന തരത്തിൽ എല്ലാ പ്രദേശങ്ങളിലേയും സൗജന്യ ആക്​സസ്​​ പോയിൻറുകൾ കാണിക്കുന്ന കവറേജ്​ മാപ്പുകൾ ലഭ്യമാക്കും.