നന്തി ബസാര്‍: നന്തി റെയില്‍വേ മേല്‍പ്പാലം ടോള്‍ബൂത്തില്‍ എ.എന്‍ ശംസീര്‍ എം.എല്‍.എ സഞ്ചരിച്ച വാഹനം തടഞ്ഞുനിര്‍ത്തി ചുങ്കം പിരിക്കാന്‍ ശ്രമിച്ചത് തര്‍ക്കത്തിനിടയാക്കി. ഇന്നലെ രാത്രി 8.30നാണ് സംഭവം. തലശ്ശേരിയില്‍നിന്ന് കോഴിക്കോട്ടേക്ക് പോവുകയായിരുന്നു എം.എല്‍.എ.
ടോള്‍ ആവശ്യപ്പെട്ടപ്പോള്‍ താന്‍ തലശ്ശേരി എം.എല്‍.എയാണെന്നു പറഞ്ഞെങ്കിലും വാഹനത്തില്‍ എം.എല്‍.എ ബോര്‍ഡ് വയ്ക്കാത്തതിനാല്‍ ജീവനക്കാരന്‍ ടോള്‍ തരാതെ വാഹനം കടത്തിവിടില്ലെന്ന് വാശിപിടിക്കുകയായിരുന്നു. അതേസമയം സംഭവമറിഞ്ഞ് കൊയിലാണ്ടി പൊലിസ് സ്ഥലത്തെത്തി ടോള്‍ബൂത്ത് ജീവനക്കാരന്‍ ചിങ്ങപുരം സ്വദേശി സുനിലിനെ കസ്റ്റഡിയിലെടുത്തു. എന്നാല്‍ തനിക്ക് ഇയാള്‍ എം.എല്‍.എയാണെന്ന് അറിയില്ലായിരുന്നുവെന്ന് സുനില്‍ പറഞ്ഞു. ഇതുസംബന്ധിച്ച് എം.എല്‍.എയുടെ പരാതി ലഭിച്ചിട്ടില്ലെന്നു പൊലിസ് പറഞ്ഞു.