പാണ്ടിക്കാട്: ഏഴു വര്‍ഷം മുന്‍പു മുള്ള്യാകുര്‍ശ്ശിയിലെ സ്‌കുളില്‍ പഠിച്ചുകൊണ്ടിരുന്ന വിദ്യാര്‍ഥിനിയെ ഫോണിലൂടെ വിളിച്ചു പരിചയപ്പെട്ടു വിളിച്ചുവരുത്തി ലൈംഗികമായി പീഡനത്തിനിരായാക്കി ഗള്‍ഫിലേക്കു കടന്ന ഓട്ടോ ഡ്രൈവറെ പത്തു വര്‍ഷത്തിനു ശേഷംനെടുമ്പാശ്ശേരി വിമാനത്താവളത്തില്‍വച്ചു പിടികൂടി.
പട്ടിക്കാട് അങ്ങാടിയില്‍ ഓട്ടോ ഡ്രൈവറായിരുന്ന വേങ്ങൂരിലെ പുല്ലൂര്‍ശ്ശന്‍കാട്ടില്‍ ജാഫറിനെയാണ് വിദേശത്തുനിന്നു നാട്ടിലേക്കു വരുംവഴി ലുക്ക്ഔട്ട് നോട്ടീസിന്റെ അടിസ്ഥാനത്തില്‍ കൊച്ചി അന്താരാഷ്ട്ര വിമാനത്താവളത്തില്‍വച്ച് എമിഗ്രേഷന്‍ വിഭാഗം പിടികൂടിയത്. പ്രതി ജാഫര്‍ വിദ്യാര്‍ഥിനിയെ ഫോണിലൂടെ പരിചയപ്പെട്ടു വിളിച്ചുവരുത്തി സുഹൃത്തായ സാദിഖിനെയും കൂടെ കൂട്ടിക്കൊണ്ടുപോയി പീഡനത്തിനിരയാക്കിയ ശേഷം  വിദേശത്തേക്കു കടക്കുകയായിരുന്നു.
പെണ്‍കുട്ടിയുടെ പരാതിയുടെ അടിസ്ഥാനത്തില്‍ മേലാറ്റൂര്‍ പൊലിസ് രജിസ്റ്റര്‍ ചെയ്ത കേസില്‍ പാണ്ടിക്കാട് സര്‍ക്കിള്‍ ഇന്‍സ്‌പെക്ടര്‍ യൂസഫ് അന്വേഷണം നടത്തിക്കൊണ്ടിരിക്കുകയായിരുന്നു. കേസിലെ രണ്ടാം പ്രതി സാദിഖിനെ അന്വേഷണവേളയില്‍തന്നെ പിടികൂടിയിരുന്നുവെങ്കിലും വിദേശത്തേക്കു കടന്ന ജാഫറിനെ പിടികൂടാനായിരുന്നില്ല. പ്രതിയെമേലാറ്റൂര്‍ എസ്.ഐ  രാജീവ് അറസ്റ്റ് ചെയ്ത് പെരിന്തല്‍മണ്ണ കോടതിയില്‍ ഹാജരാക്കി. കോടതി ഇയാളെ രണ്ടാഴ്ചത്തേയ്ക്കു റിമാന്‍ഡ് ചെയ്തു.