വടകര: മണിയൂര്‍ മന്തരത്തൂരില്‍ പശുക്കളിലെ പേവിഷ ബാധക്കു പിന്നില്‍ അജ്ഞാത ജീവിയെന്ന സംശയത്തെ തുടര്‍ന്ന് പ്രദേശത്ത് വനംവകുപ്പ് പ്രത്യേക കൂട് സ്ഥാപിച്ചു. എന്നിട്ടും പിടികൂടാനാവാത്ത സാഹചര്യത്തില്‍ നിരീക്ഷണ കാമറ വെക്കാനാണ് നീക്കം.
ഒരാഴ്ചക്കിടെ 13 പശുക്കള്‍ക്ക് ജീവന്‍ നഷ്ടമായതോടെ ക്ഷീര കര്‍ഷകരും പ്രദേശവാസികളും ഭീതിയിലാണ്.  
ഇടവഴികളില്‍ അജ്ഞാത ജീവിയുടെ കാല്‍പാദത്തിന് സാമ്യമുള്ള അടയാളങ്ങള്‍ വനം വകുപ്പ് പരിശോധനയില്‍ കണ്ടെത്തി. തുടര്‍ന്നാണ് പ്രത്യേക കൂട് സ്ഥാപിച്ചത്.
വലിയ മുതല്‍ മുടക്കുള്ള പശുക്കള്‍ ചത്തതോടെ ക്ഷീര കര്‍ഷകര്‍ വലിയ പ്രതിസന്ധിയിലാണ്.
കൂടുതല്‍ പശുക്കള്‍ ചത്ത സാഹചര്യത്തില്‍ ഗ്രാമ പഞ്ചായത്തിന്റെ നേതൃത്വത്തില്‍ ക്ഷീര വികസന വകുപ്പ്, മൃഗസംരക്ഷണ വകുപ്പ്, ആരോഗ്യ വകുപ്പ് എന്നിവര്‍ ചേര്‍ന്ന് പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി.
പ്രദേശത്ത് മുഴുവന്‍ കന്നുകാലികള്‍ക്കും ആന്റി റാബിസ് വാക്‌സിന്‍ നല്‍കി. വനം വകുപ്പ് നിരീക്ഷണ കാമറ സ്ഥാപിക്കുന്നതോടെ അജ്ഞാത ജീവിയെ കണ്ടെത്താനാകുമെന്ന പ്രതീക്ഷയിലാണ് നാട്ടുകാര്‍.