വെള്ളമുണ്ട: കണ്ടത്തുവയലില്‍ നവദമ്പതികളെ കൊലപ്പെടുത്തിയ കേസിലെ പ്രതി തൊട്ടില്‍പ്പാലം വിശ്വനാഥന്‍ സംഭവ ദിവസം വയനാട്ടിലേക്ക് വന്നതും കൊലനടത്തിയ ശേഷം തിരിച്ച് പോയതുമായ വാഹനങ്ങള്‍ കണ്ടെത്താന്‍ പൊലിസ് ശ്രമമാരംഭിച്ചു.
ജൂലൈ അഞ്ചിന് രാത്രി ഏഴോടെയാണ് കുറ്റ്യാടിയില്‍ നിന്നും പ്രതി വയനാട് ഭാഗത്തേക്കുള്ള കെ.എസ്.ആര്‍.ടി.സി ബസില്‍ കയറിയതായി പറയപ്പെടുന്നത്. ബസില്‍ നിന്നും ഉറങ്ങിപ്പോയ പ്രതി മക്കിയാടിനടുത്ത കാഞ്ഞിരങ്ങാട്ടാണ് ബസിറങ്ങിയത്. തുടര്‍ന്ന് കണ്ടത്തുവയല്‍ ഭാഗത്തേക്ക് നടക്കുന്നതിനിടെ വെളിച്ചമുണ്ടായിരുന്ന വാഴയില്‍ ഉമറിന്റെ വീട്ടില്‍ കയറുകയായിരുന്നു.
കൊലപാതകവും മോഷണവും നടത്തി റോഡിലേക്കിറങ്ങിയ പ്രതി ആറിന് പുലര്‍ച്ചെ മൂന്നോടെയാണ് ചരക്ക് ലോറിയില്‍ കയറി തോട്ടില്‍പ്പാലത്തേക്ക് പോയത്. കുറ്റ്യാടിയില്‍ നിന്നും വയനാട്ടിലേക്കെത്തിയ കെ.എസ്.ആര്‍.ടി.സി ബസും അതിലെ ജീവനക്കാരെയും കണ്ടെത്തുക എളുപ്പമാണെങ്കിലും പുലര്‍ച്ചെ തിരിച്ചു പോയ ചരക്ക്‌ലോറി കണ്ടെത്തുന്നത് വെല്ലുവിളിയാണ്. പ്രദേശത്തെ സി.സി.ടി.വി കാമറകളില്‍ പരിശോധന നടത്തിയെങ്കിലും ചരക്ക് ലോറി തിരിച്ചറിയാന്‍ കഴിഞ്ഞിട്ടില്ല.
താമരശ്ശേരി ചുരം വഴി ചരക്ക്‌ലോറികള്‍ക്ക് നിയന്ത്രണമുള്ളതിനാല്‍ കുറ്റ്യാടിചുരം വഴിയാണ് ടോറസ് വാഹനങ്ങള്‍ കടന്നുപോവുന്നത്. തൊണ്ടി മുതലുകളെല്ലാം കണ്ടെടുത്തെങ്കിലും പഴുതില്ലാത്ത വിധം കുറ്റപത്രം തയാറാക്കുന്നതിനാണ് അന്വേഷണ സംഘം കൂടുതല്‍ തെളിവുകള്‍ ശേഖരിക്കുന്നത്. തൊട്ടില്‍പാലത്ത് വീട്ടില്‍ വച്ചാണ് പാസ്‌പോര്‍ട്ട് കണ്ടെടുത്തത് അതോടൊപ്പം പ്രതിയെ നാള ഡി.എന്‍.എ പരിശോധനക്ക് വിധേയനാക്കുമെന്നാണ് സൂചന.
സംഭവ ദിവസം കൊല്ലപ്പെട്ടവരുടെ വീട്ടില്‍ നിന്നും ലഭിച്ച ചീര്‍പ്പിലുണ്ടായിരുന്ന മുടി, കൊല്ലാനുപയോഗിച്ച ആയുധം പോതിഞ്ഞ തുണി, പ്രതി അന്നേദിവസം ധരിച്ച വസ്ത്രങ്ങള്‍ തുടങ്ങിയവയാണ് പരിശോധിക്കുക. പോസ്‌റ്റോമോര്‍ട്ടത്തിന് നേതൃത്വം നല്‍കിയ ഫോറന്‍സിക് വിദഗ്ധരാണ് പരിശോധനയ്ക്ക് നേതൃത്വം നല്‍കുക.കസ്റ്റടിയുടെ ആറ് ദിവസത്തെ കാലാവധി നാളെ തീരും.