അബൂദബി: യുഎഇയെയും ഒമാനെയും ബന്ധിപ്പിക്കുന്ന പുതിയ കരാതിര്‍ത്തി തുറന്നു. ഒമാനിലെ മുസന്ദമിനെയും യുഎഇയിലെ ഫുജൈറ എമിറേറ്റ്‌സിനെയും ബന്ധിപ്പിക്കുന്ന ദിബ്ബ ബോര്‍ഡറാണ് ഇന്നലെ മുതല്‍ പ്രവര്‍ത്തനം ആരംഭിച്ചത്.

പുതിയ അതിര്‍ത്തി, പോസ്റ്റ് കണക്റ്റിവിറ്റി വര്‍ധിപ്പിക്കുന്നതിനും ഇരു രാജ്യങ്ങള്‍ക്കുമിടയില്‍ പൗരന്മാര്‍ക്കും യാത്രക്കാര്‍ക്കും ഒരുപോലെ സുഗമമായ യാത്രാ സൗകര്യം ഒരുക്കുന്നതിനും ലക്ഷ്യമിടുന്നു. പത്ത് ലക്ഷം ചതുരശ്ര മീറ്റര്‍ വിസ്തൃതിയുള്ള ഈ അതിര്‍ത്തി പോസ്റ്റില്‍ 19 കെട്ടിടങ്ങളുണ്ട്.

അതിര്‍ത്തി പോസ്റ്റിന്റെ പ്രവര്‍ത്തന ഘട്ടം ബുധനാഴ്ച ആരംഭിച്ചതായി ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ് & പോര്‍ട്ട്‌സ് സെക്യൂരിറ്റി ഡയറക്ടര്‍ ജനറല്‍ മേജര്‍ ജനറല്‍ സുഹൈല്‍ സയീദ് അല്‍ ഖൈലി സ്ഥിരീകരിച്ചു. യാത്രാ സൗകര്യം പ്രോത്സാഹിപ്പിക്കുന്നതിനും യുഎഇയും ഒമാനും തമ്മിലുള്ള വ്യാപാര ബന്ധം ശക്തിപ്പെടുത്തുന്നതിനുമാണ് പുതിയ സൗകര്യം രൂപകല്‍പ്പന ചെയ്തിരിക്കുന്നതെന്ന് അദ്ദേഹം പറഞ്ഞു.

ഒമാന്‍ സുല്‍ത്താനേറ്റിനെ യുഎഇയുമായി ബന്ധിപ്പിക്കുന്ന മുസന്ദമിലെ ദിബ്ബ ബോര്‍ഡര്‍ ക്രോസിംഗ് തുറന്നതായി ഒമാനി അധികൃതര്‍ പ്രഖ്യാപിച്ചു. സുഗമമായ ചലനം സാധ്യമാക്കുന്നതിനായി കര അതിര്‍ത്തികള്‍, വിമാനത്താവളങ്ങള്‍, തുറമുഖങ്ങള്‍ എന്നിവയ്ക്കായുള്ള വിശാലമായ സുരക്ഷാ മാനേജ്‌മെന്റ് ശ്രമങ്ങളുടെ ഭാഗമാണിത്. പുതുതായി പ്രവര്‍ത്തനക്ഷമമായ അതിര്‍ത്തി ഉപയോഗിക്കുമ്പോള്‍ ആവശ്യമായ എല്ലാ യാത്രാ നടപടിക്രമങ്ങളും പാലിക്കുന്നുണ്ടെന്നും ആവശ്യമായ രേഖകള്‍ കൈവശം വയ്ക്കണമെന്നും അധികൃതര്‍ യാത്രക്കാരോട് അഭ്യര്‍ത്ഥിച്ചു.

ഒമാനിലെ ഏറ്റവും പ്രധാനപ്പെട്ട വിനോദസഞ്ചാര കേന്ദ്രമായ മുസന്ദമിലേക്ക് ഇതുവഴി കൂടുതല്‍ ആളുകള ആകര്‍ഷിക്കാമെന്ന കണക്കുകൂട്ടലിലാണ് ഒമാന്‍. ഇരുരാജ്യങ്ങളും തമ്മിലുള്ള ചരക്കുനീക്കത്തിലും പുതിയ അതിര്‍ത്തിക്ക് വലിയ പങ്കു വഹിക്കാനായേക്കും.

New border between UAE and Oman; More convenience for transportation and travel