പാലക്കാട്: ആലത്തൂരിൽ 14 കാരനുമായി നാടുവിട്ട 35കാരിക്കെതിരെ പോക്സോ കേസെടുത്തു. കുനിശ്ശേരി കുതിരപ്പാറ സ്വദേശിയായ വീട്ടമ്മയെ പൊലീസ് പിടികൂടി കോടതി 14 ദിവസത്തേക്ക് ജുഡീഷ്യൽ കസ്റ്റഡിയിൽ വിട്ടു. 11 വയസുള്ള മകന്റെ സുഹൃത്തിൻ്റെ ജേഷ്ഠനായ 14 കാരനെയും വീട്ടമ്മ നാടു വിട്ടത്.

കുട്ടി സ്കൂൾ പരീക്ഷ കഴിഞ്ഞ് വൈകിയും വീട്ടിലെത്താത്തതിനെ തുടർന്ന് മാതാപിതാക്കൾ നടത്തിയ അന്വേഷണത്തിലാണ് വീട്ടമ്മക്കൊപ്പമുണ്ടെന്ന് കണ്ടെത്തിയത്. തുടര്‍ന്ന് കുടുംബം ആലത്തൂർ പൊലീസിൽ പരാതി നൽകി. അന്വേഷണം ഊർജിതമാക്കിയ പൊലീസ് എറണാകുളത്ത് നിന്ന് ഇരുവരെയും കണ്ടെത്തുകയായിരുന്നു.

കുട്ടിയെ തട്ടിക്കൊണ്ടുപോയതല്ല, അവൻ സ്വന്തം ഇഷ്ടപ്രകാരം തന്നോടൊപ്പം വന്നതാണെന്നാണ് വീട്ടമ്മ പൊലീസിനോട് പറഞ്ഞത്. എന്നാൽ മാതാപിതാക്കളുടെ പരാതിയെത്തുടർന്ന് പൊലീസ് യുവതിക്കെതിരെ പോക്സോ നിയമപ്രകാരം കേസെടുത്തു. കൂടാതെ ജുവനൈൽ ജസ്റ്റിസ് ആക്ട് പ്രകാരവും തട്ടിക്കൊണ്ടുപോകൽ കുറ്റവും ചുമത്തിയിട്ടുണ്ട്.

ഇന്നലെ തന്നെ പ്രതിയുടെ വൈദ്യപരിശോധന പൂർത്തിയാക്കി കോടതി മുമ്പാകെ ഹാജരാക്കി. കോടതി 14 ദിവസത്തേക്ക് ജുഡീഷ്യൽ കസ്റ്റഡിയിൽ വിട്ടു. സംഭവത്തെ കുറിച്ച് കൂടുതൽ അന്വേഷണം തുടരുകയാണെന്ന് പൊലീസ് അറിയിച്ചു.