കൊച്ചി: കേന്ദ്രസംസ്ഥന സര്‍ക്കാരുകളുടെ കര്‍ഷകദ്രോഹ നടപടികള്‍ക്കെതിരേ ജില്ലാ കര്‍ഷക കോണ്‍ഗ്രസ് കമ്മിറ്റിയുടെ നേതൃത്വത്തില്‍ കണയന്നൂര്‍ താലൂക്ക് ഓഫിസിലേക്ക് കര്‍ഷക മാര്‍ച്ചും ധര്‍ണയും നടത്തുമെന്ന് കര്‍ഷക കോണ്‍ഗ്രസ് ജില്ലാ പ്രസിഡന്റ് കെ.ജെ ജോസഫ് വാര്‍ത്താ സമ്മേളനത്തില്‍ പറഞ്ഞു.
23ന് രാവിലെ 10 മണിക്ക് ഡി.സി.സി ഓഫീസില്‍ നിന്ന് ആരംഭിക്കുന്ന മാര്‍ച്ച് ഡി.സി.സി പ്രസിഡന്റ് ടി.ജെ വിനോദ് ഉദ്ഘാടനം ചെയ്യും. ഉപാധികളില്ലാതെ 13 മാസക്കാലത്തെ കര്‍ഷക പെന്‍ഷന്‍ നല്‍കുവാനുള്ള നടപടികള്‍ സ്വീകരിക്കുക, നെല്ലിന്റെ സംരഭരണവില നെല്ലെടുത്താല്‍ ഉടന്‍ നല്‍കുവാനുള്ള സംവിധാനം ഏര്‍പ്പെടുത്തുക, പച്ചതേങ്ങ സംഭരണം ഉടന്‍ ആരംഭിക്കുക, നാളികേര സംഭരണം എല്ലാ പഞ്ചായത്തുകളിലും സഹകരണ സംഘങ്ങളും വഴി നടപ്പിലാക്കുക തുടങ്ങി 13 ഇന ആവശ്യങ്ങള്‍ ഉന്നയിച്ചാണ് ധര്‍ണ നടത്തുന്നത്. ജോര്‍ജ് ഏളാമറ്റം, പി.എസ് ഭാസി എന്നിവരും വാര്‍ത്താ സമ്മേളനത്തില്‍ പങ്കെടുത്തു.