ശാസ്താംകോട്ട: കട പൂട്ടിയിറങ്ങിയ സ്വര്‍ണ വ്യാപാരിയുടെ പണവും സ്വര്‍ണവുമടങ്ങിയ ബാഗ് തട്ടിയെടുത്തു.
വെള്ളിയാഴ്ച്ച രാത്രി പത്തോടെ ചക്കുവള്ളിയിലായിരുന്നു സംഭവം.
ചക്കുവള്ളിയിലെ ശില്‍പി ജ്വല്ലറി ഉടമ ആര്‍. രമണന്റെ ബാഗാണ് മോഷ്ടാവ് തട്ടിയെടുത്തത്. 65 പവന്‍ സ്വര്‍ണവും 79,000 രൂപയും ബാഗിലുണ്ടായിരുന്നു. കടയടക്കുമ്പോള്‍ സ്റ്റോക്കുള്ള സ്വര്‍ണം ഇദ്ദേഹം വീട്ടില്‍ കൊണ്ടുപോകാറാണ് പതിവ്. ഇതിനായി ബാഗെടുത്ത് ടേബിളിന്റെ പുറത്തുവച്ച് ലൈറ്റണയ്ക്കുന്നതിനിടെ റോഡിനു എതിര്‍വശത്ത് നിന്ന് പാഞ്ഞെത്തിയ മോഷ്ടാവ് ബാഗും എടുത്ത് ഓടി പോവുകയായിരുന്നു.
ജങ്ഷനിലുള്ള യുവാക്കള്‍ മോഷ്ടാവിനെ പിന്തുടര്‍ന്നെങ്കിലും കണ്ടെത്താനായില്ല. ഇതര സംസ്ഥാന തൊഴിലാളിയാണ് മോഷ്ടാവെന്ന്  സംശയിക്കുന്നു. ജ്വല്ലറിക്ക് സമീപത്തെ ഹോട്ടലിന് പിറകിലൂടെയുള്ള ഇടവഴിയിലൂടെയാണ് മോഷ്ടാവ് രക്ഷപെട്ടത്.
സമീപത്തെ കടകളിലെ സി.സി. ടി.വി ദൃശ്യങ്ങളില്‍ നിന്നും പൊലിസ് വിവരങ്ങള്‍ ശേഖരിച്ചിട്ടുണ്ട്.
ശൂരനാട് എസ്.ഐ സജീഷ്‌കുമാറിന്റെ നേതൃത്വത്തില്‍ അന്വേഷണം ആരംഭിച്ചു.