ലണ്ടന്‍: സെമി പ്രതീക്ഷകള്‍ വച്ചുപുലര്‍ത്തുന്ന പാകിസ്താന് ഇന്ന് നിര്‍ണായക പോരാട്ടം. വൈകിട്ട് മൂന്നിന് നടക്കുന്ന മത്സരത്തില്‍ അഫ്ഗാനിസ്ഥാനെയാണ് പാകിസ്താന്‍ നേരിടുന്നത്. ഏഴ് മത്സരങ്ങള്‍ പൂര്‍ത്തിയാക്കിയ പാകിസ്താന്‍ മൂന്നെണ്ണത്തില്‍ മാത്രമാണ് ജയിച്ചിട്ടുള്ളത്. ഏഴ് പോയിന്റ് മാത്രമാണ് പാകിസ്താന്റെ സമ്പാദ്യം. ഇനിയുള്ള രണ്ട് മത്സരങ്ങളില്‍ ജയിച്ചാല്‍ സെമിയിലേക്ക് ചെറിയ പ്രതീക്ഷയെങ്കിലും പാകിസ്താന് വച്ച്പുലര്‍ത്താം.

അതേസമയം, ടൂര്‍ണമെന്റില്‍നിന്ന് പുറത്തായ അഫ്ഗാനിസ്ഥാന് തോല്‍വിയെ കുറിച്ചോ ജയത്തെ കുറിച്ചോ ചിന്തിക്കേണ്ടതില്ല. എന്നാലും ഏഴ് മത്സരത്തില്‍ ഒന്നു പോലും ജയിക്കാത്ത അഫ്ഗാനിസ്ഥാന്‍ ഒരു മത്സരമെങ്കിലും ജയിച്ച് നാട്ടിലേക്ക് തിരിക്കുക എന്ന ലക്ഷ്യത്തിലാണുള്ളത്. വിന്‍ീഡീസിനെതിരേയുള്ള ഒരു മത്സരം കൂടി അഫ്ഗാനിസ്ഥാന് ബാക്കിയുണ്ട്. ഇന്ത്യയെ വിറപ്പിച്ച അഫ്ഗാനിസ്ഥാന് പാകിസ്താനെതിരേയും ഇത്തരത്തില്‍ പ്രകടനം പുറത്തെടുക്കാന്‍ കഴിയുമെന്ന പ്രതീക്ഷയാണ്.

വൈകിട്ട് ആറിന് നടക്കുന്ന മറ്റൊരു മത്സരത്തില്‍ ആസ്‌ത്രേലിയ ന്യൂസിലന്‍ഡിനെ നേരിടും. മികച്ച ഫോമില്‍ നില്‍ക്കുന്ന രണ്ട് ടീമുകളായതിനാല്‍ ഈ മത്സരം പ്രവചനാതീതമാകും. ആസ്‌ത്രേലിയ 12 പോയിന്റുമായി ഒന്നാം സ്ഥാനത്തും ന്യൂസിലന്‍ഡ് 11 പോയിന്റുമായി മൂന്നാം സ്ഥാനത്തും നില്‍ക്കുന്നു.