പൊന്നാനി: ഹര്‍ത്താലുകള്‍ മലയാളികള്‍ക്ക് എന്നും ആഘോഷമാണ്. എന്നാല്‍ പൊന്നാനിയില്‍  നടന്ന ഹര്‍ത്താല്‍ വെറുതെ  ഇരിക്കാനോ ആഘോഷിക്കാനോ ആയിരുന്നില്ല.  ശുചിത്വത്തിനായി ഒരു ശുചീകരണ ഹര്‍ത്താലാണ്  പൊന്നാനിയില്‍ നടന്നത്. മഴക്കാല പൂര്‍വ ശുചീകരണത്തിന്റെ ഭാഗമായി പരിസരം വൃത്തിയാക്കാനാണ്  മാതൃകാ ഹര്‍ത്താലിന് പൊന്നാനി നഗരസഭ ആഹ്വാനം ചെയ്തത്. മഴക്കാലത്തിനു മുന്‍പു തന്നെ  നഗരസഭയിലെ മുഴുവന്‍ വാര്‍ഡുകളും ശുചീകരിക്കുക എന്ന ലക്ഷ്യത്തോടെയാണ് ഹര്‍ത്താല്‍ നടത്തിയത്. ജനപ്രതിനിധികളും ഉദ്യോഗസ്ഥരും നാട്ടുകാരും ശുചീകരണ പ്രവൃത്തികളില്‍ പങ്കാളികളായാണ്  ഹര്‍ത്താലിനെ സ്വീകരിച്ചത്.
മഴയോടൊപ്പം വരാനിരിക്കുന്ന ഗുരുതര സാംക്രമിക  രോഗങ്ങളെ തടയുക എന്ന ലക്ഷ്യം വച്ചാണ് നഗരസഭ നേരത്തെ തന്നെ ഇത്തരം പ്രവര്‍ത്തനങ്ങള്‍ക്ക്  നേതൃത്വം  നല്‍കിയത്. ഇതിന്റെ ഭാഗമായി ആരോഗ്യ പ്രവര്‍ത്തകരുടേയും ജനപ്രതിനിധികളുടേയും യോഗം  നഗരസഭയില്‍ വിളിച്ച് ചേര്‍ത്തിരുന്നു. മെയ് മാസം 10 മുതല്‍ 20 വരെ  മഴക്കാല പൂര്‍വ്വ  ശുചീകരണ തീവ്രയജ്ഞം നടത്താന്‍ യോഗത്തില്‍ തീരുമാനമായിരുന്നു. ഇതിന്റെ ഭാഗമായാണ് മെയ് 20  ന് ശുചിത്വ ഹര്‍ത്താല്‍ നടത്തിയത്. കഴിഞ്ഞ 10, 11 ദിവസങ്ങളില്‍ മുഴുവന്‍ വാര്‍ഡ്തല ആരോഗ്യ  ശുചിത്വ പോഷക കമ്മിറ്റികളും ചേര്‍ന്നിരുന്നു. ശുചീകരണ പ്രവര്‍ത്തനങ്ങള്‍ക്ക്  ശുചിത്വ മിഷന്റെ  10,000 രൂപയും നഗരസഭ തന്നത് ഫണ്ടില്‍ നിന്ന് 5000 രൂപയും ഉള്‍പ്പെടെ 15000 രൂപ 51 വാര്‍ഡ്  സമിതിക്ക് നല്‍കി. മഴക്കാല പൂര്‍വ്വ ശുചീകരണത്തിന് മുന്നൊരുക്കവുമായി പൊന്നാനി നഗരസഭയില്‍  വിവിധ സര്‍ക്കാര്‍ വകുപ്പ്  മേധാവികളുടെ യോഗവും ചേര്‍ന്നിരുന്നു.
ശുചിത്വ ഹര്‍ത്താലിന്റെ  ഭാഗമായി പൊന്നാനി നഗരസഭയിലെ വിവിധ വാര്‍ഡുകള്‍ക്കു പുറമെ പൊന്നാനി മുനിസിപ്പല്‍  ഓഫിസ്, താലൂക്ക് ആശുപത്രി, താലൂക്ക് ഓഫിസ്,  ഫിഷറീസ് ഓഫിസ്, കൃഷിഭവന്‍,  അങ്കണവാടികള്‍,  ബസ് സ്റ്റാന്‍ഡ് എന്നിവിടങ്ങളിലും ശുചീകരണ പ്രവൃത്തികള്‍ നടന്നു.