കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ ഹജ്ജിന് പോകുന്ന തീര്‍ഥാടകര്‍ക്ക് 54 കിലോ സാധനങ്ങള്‍ കൊണ്ടുപോകാം.22 കിലോയുടെ രണ്ട് ബാഗേജിലും 10 കിലോ ഹാന്‍ഡ് ബാഗിലുമാണ് കൊണ്ടുപോകാന്‍ അനുമതി. നിശ്ചിത വലിപ്പവും ആകൃതിയുമുള്ള ബാഗേജുകളാണ് യാത്രയില്‍ ഉപയോഗിക്കേണ്ടതെന്ന് കേന്ദ്ര ഹജ്ജ് കമ്മിറ്റി നിര്‍ദേശം നല്‍കി.

ചെക്കിങ് ബാഗേജിന്റെ വലിപ്പം 75 സെന്റീമീറ്റര്‍ നീളവും 55 സെന്റീമീറ്റര്‍ വീതിയും 28 സെന്റീമീറ്റര്‍ ഉയരവുമുള്ളവയായിരിക്കണം. 55 സെന്റീമീറ്റര്‍ നീളവും 40 സെന്റീമീറ്റര്‍ വീതിയും 23 സെന്റീമീറ്റര്‍ ഉയരവുമുള്ളതായിരിക്കണം ഹാന്‍ഡ് ബാഗ്. കേന്ദ്ര ഹജ്ജ് കമ്മിറ്റി നിഷ്‌കര്‍ഷിച്ച സ്റ്റാന്‍ഡേര്‍ഡ് ബാഗേജ് അല്ലാത്തവ വിമാനത്താവളങ്ങളില്‍ തടയും. സ്റ്റാന്‍ഡേര്‍ഡ് ബാഗേജ് അല്ലാത്തവ നഷ്ടപ്പെട്ടാലുള്ള ഉത്തരവാദിത്തം ഹജ്ജ് കമ്മിറ്റി ഏറ്റെടുക്കില്ല. ഹജ്ജിന് പുറപ്പെടുമ്പോള്‍ ബാഗേജിന് പുറത്ത് പേരും മേല്‍വിലാസവും വിമാന നമ്പറും എംബാര്‍ക്കേഷന്‍ പോയിന്റും മാര്‍ക്കര്‍ ഉപയോഗിച്ച് രേഖപ്പെടുത്തണം. വിമാനത്താവളങ്ങളില്‍ ബാഗേജുകള്‍ എളുപ്പത്തില്‍ കൈകാര്യംചെയ്യുന്നതിനും നഷ്ടപ്പെട്ടാല്‍ കണ്ടെത്തുന്നതിനുമാണ് വിവരങ്ങള്‍ രേഖപ്പെടുത്തുന്നത്.

കൊണ്ടുപോകുന്ന ബാഗേജിന് ഗുണനിലവാരം വേണം. കീറിയതും പഴകിയതുമായ ബാഗേജുകള്‍ കൊണ്ടുപോകാന്‍ അനുവദിക്കില്ല. ഹജ്ജ് കഴിഞ്ഞ് മടങ്ങുമ്പോള്‍ അഞ്ച് ലിറ്റര്‍ സംസം വെള്ളം വിമാന കമ്പനി നേരിട്ട് കൊണ്ടുവരും. സംസം മക്കയില്‍നിന്ന് നേരിട്ട് കൊണ്ടുവരേണ്ടതില്ല.