അര്‍ജന്റീന 2-0 വെനസ്വല
ചിലിയോട് പരാജയപ്പെട്ട്
കൊളംബിയ പുറത്ത്

പോര്‍ട്ടോ അലെഗ്രെ: ആരാധകരുടെ സ്വപ്ന കാത്തിരിപ്പിന് ലോങ് വിസില്‍ മുഴങ്ങി. കോപ അമേരിക്ക സെമിഫൈനലില്‍ കരുത്തരായ ബ്രസീലും അര്‍ജന്റീനയും തമ്മില്‍ ഏറ്റുമുട്ടും. ബുധനാഴ്ച ബെലോ ഹൊറിസോന്റിയിലെ മിനെയ്‌റോ സ്റ്റേഡിയത്തിലാണ് ലോകഫുട്‌ബോളിലെ ക്ലാസിക് പോരാട്ടം നടക്കുന്നത്.

ഇന്നലെ നടന്ന ക്വാര്‍ട്ടര്‍ മത്സരത്തില്‍ വെനസ്വലയെ മറുപടിയില്ലാത്ത രണ്ട് ഗോളിന് അര്‍ജന്റീന തകര്‍ത്തതോടെയാണ് ലോക ഫുട്‌ബോള്‍ പ്രേമികളുടെ സ്വപ്ന സെമിഫൈനലിന് തിരിതെളിഞ്ഞത്. നേരത്തെ പരാഗ്വെയെ പരാജയപ്പെടുത്തി ബ്രസീലും സെമിയിലെത്തിയിരുന്നു. ബുധനാഴ്ച രാവിലെ ആറിനാണ് മത്സരം. മറ്റൊരു ക്വാര്‍ട്ടറില്‍ കിരീട പ്രതീക്ഷയുമായെത്തിയ കൊളംബിയയെ ഷൂട്ടൗട്ടില്‍ മറികടന്ന് നിലവിലെ ചാംപ്യന്മാരായ ചിലിയും സെമിഫൈനലിലെത്തി. ഉറുഗ്വെ - പെറു മത്സരത്തിലെ വിജയികളാണ് സെമിഫൈനലില്‍ ചിലിയുടെ എതിരാളികള്‍.

വെനസ്വലയ്‌ക്കെതിരേ തുടക്കം മുതല്‍ ആക്രമിച്ചു കളിച്ച അര്‍ജന്റീന പത്താം മിനുട്ടില്‍ തന്നെ ലീഡ് നേടിയിരുന്നു. ലൗതാരോ മാര്‍ട്ടിനെസാണ് ഗോള്‍ നേടിയത്. 74ാം മിനിറ്റില്‍ പകരക്കാരനായി ഇറങ്ങിയ ജിയോവനി ലോ സെല്‍സോയാണ് അര്‍ജന്റീനക്ക് വേണ്ടി രണ്ടാം ഗോള്‍ ലക്ഷ്യത്തിലെത്തിച്ചത്. മികച്ച മത്സരം കാഴ്ചവച്ച വെനസ്വലക്കെതിരേ ശക്തമായ പ്രതിരോധമൊരുക്കിയാണ് അര്‍ജന്റീന മത്സരം സ്വന്തമാക്കിയത്. കളിയുടെ മുഴുവന്‍ സമയത്തും ചിലിയും കൊളംബിയയും ഗോള്‍രഹിത സമനില പാലിച്ചതിനെ തുടര്‍ന്നാണ് മത്സരം ഷൂട്ടൗട്ടിലേക്ക് നീണ്ടത്. ഷൂട്ടൗട്ടില്‍ 5-4ന് ജയിച്ചാണ് ചിലി സെമി ബെര്‍ത്ത് ഉറപ്പാക്കിയത്. കൊളംബിയക്ക് വേണ്ടി അഞ്ചാം കിക്കെടുത്ത വില്യം ടെസില്ലോ പന്ത് പുറത്തേക്കടിക്കുകയായിരുന്നു.

അര്‍ജന്റീന - ബ്രസീല്‍

ലോക ഫുട്‌ബോളിലെ ക്ലാസിക് പോരാട്ടത്തിനാണ് ബുധനാഴ്ച സാക്ഷ്യം വഹിക്കുന്നത്. നിലവില്‍ മൂര്‍ച്ച കുറഞ്ഞ ടീമാണെങ്കിലും അര്‍ജന്റീനക്ക് ബ്രസീലിനോട് ഒരുപാട് കണക്കുകള്‍ തീര്‍ക്കാനുണ്ട്. 109 തവണയാണ് ഇരു ടീമുകളും തമ്മില്‍ ഏറ്റുമുട്ടിയത്. ഇതില്‍ 45 വിജയങ്ങളും ബ്രസീലിനൊപ്പമായിരുന്നു. 39 തവണ അര്‍ജന്റീനയും വിജയിച്ചു.
25 മത്സരം സമനിലയില്‍ അവസാനിച്ചു. 2018 ല്‍ നടന്ന അമേരിക്കന്‍ സൂപ്പര്‍ ക്ലാസികോയിലാണ് ഇരുടീമുകളും അവസാനമായി ഏറ്റുമുട്ടിയത്. അന്ന് ഇഞ്ചുറി സമയത്ത് മിറാന്‍ഡ നേടിയ ഹെഡ്ഡര്‍ ഗോളില്‍ ബ്രസീലിനായിരുന്നു വിജയം. 2007ല്‍ വെനസ്വലയില്‍ നടന്ന കോപ അമേരിക്ക ഫുട്‌ബോളില്‍ ബ്രസീലും അര്‍ജന്റീനയും സെമിയില്‍ ഏറ്റുമുട്ടിയിരുന്നു. ലയണല്‍ മെസ്സിയുള്‍പ്പെട്ട അര്‍ജന്റീനയെ ബ്രസീല്‍ അന്ന് 3-0ന് പരാജയപ്പെടുത്തി.