പുല്‍പ്പള്ളി: കുടിവെള്ള ക്ഷാമം രൂക്ഷമായ പുല്‍പ്പള്ളി പഞ്ചായത്തിലെ 2500 ഓളം കുടുംബങ്ങള്‍ക്ക് കുടിവെള്ളമെത്തിക്കുന്നതിനായി ആരംഭിച്ച ജലനിധി പദ്ധതി വേഗത്തില്‍ പൂര്‍ത്തിയാക്കാന്‍ നടപടി വേണമെന്ന് പുല്‍പ്പള്ളി ഗ്രാമവികസനവേദി യോഗം ആവശ്യപ്പെട്ടു.
 കുഴല്‍ കിണറുകള്‍ക്കും മറ്റും സംസ്ഥാന സര്‍ക്കാര്‍ നിയന്ത്രണമേര്‍പ്പെടുത്തിയത് കാരണം ഭൂരിഭാഗം കുടുംബങ്ങളും ജലനിധി പദ്ധതിയെയാണ് ആശ്രയിക്കുന്നത്.
കടുത്ത വേനല്‍ മൂലം കിണറുകളും കുഴല്‍കിണറുകളും വറ്റിയതോടെ പഞ്ചായത്ത് വിതരണം ചെയ്യുന്ന കുടിവെള്ളമാണിപ്പോള്‍ പലകുടുംബങ്ങളും ഉപയോഗിക്കുന്നത്. വേനല്‍മഴ ലഭിച്ചെങ്കിലും കിണറുകളിലും കുഴല്‍കിണറുകളിലും ജലനിരപ്പ് ഉയരാത്തതും ജലക്ഷാമം രൂക്ഷമാകാന്‍ കാരണമായി.
പഞ്ചായത്തിലെ 20 വാര്‍ഡുകളിലും കുടിവെള്ളമെത്തിക്കുന്നതിനായാണ് പുല്‍പ്പള്ളി പഞ്ചായത്ത് 13 കോടി രൂപയുടെ പദ്ധതി ആരംഭിച്ചത്. എന്നാല്‍ റോഡ് മുറിച്ച് പൈപ്പ് ഇടുന്നതുമായി ബന്ധപ്പെട്ടുള്ള തര്‍ക്കങ്ങള്‍ നീണ്ടുപോയതും മറ്റുമാണ് പദ്ധതി പ്രവര്‍ത്തനം വൈകാന്‍ കാരണമായതെന്നാണ് പഞ്ചായത്ത് അധികൃതര്‍ പറയുന്നത്. എന്നാല്‍ പദ്ധതി പ്രവര്‍ത്തനം വേഗത്തിലായാല്‍ മാത്രമെ ജലക്ഷാമത്തിന് പരിഹാരം കാണാന്‍ കഴിയു. തര്‍ക്കങ്ങള്‍ പരിഹരിച്ച് കുടിവെള്ളം വിതരണം ചെയ്യുന്നതിനാവശ്യമായ പ്രവര്‍ത്തനങ്ങള്‍ക്ക് നടപടി വേണമെന്നാണ് ഗുണഭോക്താക്കളുടെ ആവശ്യം.
പഞ്ചായത്ത് ഇക്കാര്യത്തില്‍ ആവശ്യമായ നടപടി സ്വീകരിച്ച് കുടിവെള്ളമെത്തിക്കണമെന്നും പുല്‍പ്പള്ളി ഗ്രാമവികസനവേദി യോഗം ആവശ്യപ്പെട്ടു. ബേബി മാത്യു അധ്യക്ഷനായി. രമേശന്‍, അഖില്‍, കൃഷ്ണന്‍കുട്ടി, കുഞ്ഞുമോന്‍, അജിത്ത് കുമാര്‍, കെ.സി വക്കച്ചന്‍ സംസാരിച്ചു.