പട്ടാമ്പി: ആള്‍കേരള കുങ്ഫു അസോസിയേഷന്‍ തിരൂരില്‍ നടത്തിയ പത്താമത് സംസ്ഥാന കുങ്ഫു ചാമ്പ്യന്‍ഷിപ്പില്‍ പാലക്കാടിന് ഓവറോള്‍ട്രോഫി ലഭിച്ചതായി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ആദ്യമായാണ് പാലക്കാട് ഓവറോള്‍ കിരീടം നേടുന്നത്.മലപ്പുറം രണ്ടും കോഴിക്കോട് മൂന്നും സ്ഥാനം നേടി. 500 ല്‍ പരം മത്സരാര്‍ഥികളാണ് പങ്കെടുത്തത്.
പാലക്കാട് 165 ഉം മലപ്പുറം 140 ഉം കോഴിക്കോട് 120 ഉം പോയന്റ് നേടി.ടി.എസ് ദിയ,അനാമിക കൃഷ്ണന്‍(സബ്ജൂനിയര്‍ ഗ്രൂപ്പ് ഫോം)നിഖില്‍രാജ്(സബ്ജൂനിയര്‍ ഫോം)ഒന്നാം സ്ഥാനം നേടി. വിവിധ വെയ്റ്റ് കാറ്റഗറിയില്‍ വിജിന്‍ ശങ്കര്‍,ഐ.ടി സംഗീത്,നയന രമേശ്,നന്ദന രമേശ്,പ്രാര്‍ഥന,സുഹൈല്‍,യു.കെ രജ്ഞിത്ത് എന്നിവര്‍ ഒന്നാം സ്ഥാനവും വി.ആര്‍ വിഷ്ണു,നിഖില്‍ രാജ്,അരുണ്‍ രണ്ടാം സ്ഥാനവും കരസ്ഥമാക്കി.വിജയികള്‍ക്ക് ജൂലൈ 31 ന് രാവിലെ 11 മണിക്ക് ഷൊര്‍ണൂര്‍ ബസ് സ്റ്റാന്റ് പരിസരത്ത് ഷാവോലിന്‍ കുങ്ഫു സെന്ററില്‍ സ്വീകരണം നല്‍കുമെന്നും ഭാരവാഹികള്‍ പറഞ്ഞു. ദേശീയ ചാമ്പ്യന്‍ഷിപ്പ് പാലക്കാട്ട് നടത്തുമെന്ന് അസോസിയേഷന്‍ ജില്ലാ പ്രസിഡണ്ട് പി ഹരിദാസ്, സെക്രട്ടറി കെ.ആര്‍ വിഷ്ണു, ട്രഷറര്‍ ബല്‍രാജ് വാര്‍ത്താസമ്മേളനത്തില്‍ അറിയിച്ചു.