ആലക്കോട്: മലയോരമേഖലയില്‍ ജനങ്ങളെ ആശങ്കയിലാഴ്ത്തി പുഴകളിലെ ജനനിരപ്പ് ക്രമാതീതമായി താഴുന്നു. ചപ്പാരപ്പടവ് പുഴയില്‍ മഴയൊഴിഞ്ഞ് ദിവസങ്ങള്‍ക്കുള്ളില്‍ നീരൊഴുക്കു നിലയ്ക്കാറായ അവസ്ഥയാണ്. മുന്‍വര്‍ഷങ്ങളില്‍ മഴ മാറി ഏതാനും മാസങ്ങള്‍ കഴിഞ്ഞാണ് പുഴയിലെ നീരൊഴുക്കു കുറഞ്ഞിരുന്നത്. ഇത് വരാനിരിക്കുന്ന കൊടുംവരള്‍ച്ചയുടെയും ജലക്ഷാമത്തിന്റെയും സൂചനയായി കരുതുന്നു. ഇത്തവണ മഴ മാറിയതു മുതല്‍ കടുത്ത ചൂടാണ് മലയോരത്ത് അനുഭവപ്പെടുന്നത്.
മലയോരത്തെ പ്രധാന ജലസ്രോതസുകളാണ് മണക്കടവ്, ആലക്കോട്, കരുവഞ്ചാല്‍ പുഴകള്‍. ഇവ ചേര്‍ന്നൊഴുകുന്നതാണ് ചപ്പാരപ്പടവ് പുഴ. ഇവയിലെ നീരൊഴുക്കിനെ ആശ്രയിച്ചാണ് മേഖലയിലെ ജലലഭ്യത. ഈ പുഴകള്‍ ഒഴുകുന്ന ഉദയഗിരി, ആലക്കോട്, നടുവില്‍, ചപ്പാരപ്പടവ് പഞ്ചായത്തുകളിലെ കിണറുകളിലെയും കുളങ്ങളിലെയും ജലലഭ്യത നീരൊഴുക്കിനെ അടിസ്ഥാനപ്പെടുത്തിയാണ്. പുഴകള്‍ സംരക്ഷിക്കുന്നതില്‍ അധികൃതര്‍ കാട്ടുന്ന അലംഭാവമാണ് പുഴകളുടെ ശോഷണത്തിനും നാശത്തിനും കാരണമാകുന്നത്.
പുഴകള്‍ക്കും പുഴയോരങ്ങള്‍ക്കും നേരെയുള്ള കൈയേറ്റങ്ങള്‍ മേഖലയില്‍ വര്‍ധിച്ചുവരികയാണ്. നീരൊഴുക്കു തടസപ്പെടുത്തിയാണ് പലരുടെയും കൈയേറ്റം. റീസര്‍വേ നടക്കാത്തതിനാല്‍ അവയൊന്നും അധികൃതര്‍ക്കു കണ്ടെത്താനോ നിയമനടപടിയെടുക്കാനോ കഴിയുന്നില്ല.