കല്‍പ്പറ്റ: കേന്ദ്ര സര്‍ക്കാരിന്റെ മുത്വലാഖ് നിരോധന ഓര്‍ഡിനന്‍സ് സദുദ്ദേശത്തോടെയല്ലെന്നും രാഷ്ട്രീയ ലാഭം മാത്രമാണ് ലക്ഷ്യമെന്നും എസ്.കെ.എസ്.എസ്.എഫ് വയനാട് ജില്ലാ കമ്മിറ്റി.
തെരഞ്ഞെടുപ്പ് അടുക്കുമ്പോള്‍ മതവികാരം ഇളക്കിവിട്ട് നേട്ടമുണ്ടാക്കുന്ന പ്രവണത ബി.ജെ.പി അവസാനിപ്പിക്കണമെന്നും യോഗം ആവശ്യപ്പെട്ടു. ഇത്തരം ദുഷിച്ച ചിന്താഗതികളില്‍ നിന്ന് കേന്ദ്രം പിന്മാറണം. ഭരണഘടനക്കും ഇന്ത്യയിലെ സാമൂഹിക ഘടനക്കും എതിരായ കേന്ദ്ര സര്‍ക്കാര്‍ നീക്കങ്ങള്‍ കോടതികള്‍ ഇടപെട്ട് തിരുത്തണം. സ്ത്രീക്ക് ഒറ്റക്ക് പുറത്തിറങ്ങി നടക്കാന്‍ കഴിയാത്ത രാജ്യത്ത് സ്ത്രീസുരക്ഷക്ക് ഓര്‍ഡിനന്‍സ് കൊണ്ടു വരുന്നതിന് പകരം ചില മത വിഭാഗത്തെ തെരഞ്ഞുപിടിച്ച് അക്രമിക്കുന്നത് കാടത്തമാണ്. വര്‍ഗീയ ഫാസിസ്റ്റ് ശക്തികള്‍ക്കെതിരേ ഒന്നിച്ച് പോരാടാന്‍ രാജ്യത്തെ മതേതരകക്ഷികള്‍ മുന്നോട്ടുവരണം. തെരഞ്ഞെടുപ്പ് അടുത്തപ്പോള്‍ അയോധ്യ തര്‍ക്കം വീണ്ടും ഉയര്‍ത്തി രാഷ്ട്രീയ ലാഭം കൊയ്യാനുള്ള ശ്രമം ഇന്ത്യയിലെ മതേതര വിശ്വാസികള്‍ തിരിച്ചറിയണമെന്നും യോഗം ആവശ്യപ്പെട്ടു.പ്രസിഡന്റ് മുഹിയുദ്ദീന്‍ കുട്ടി യമാനി അധ്യക്ഷനായി. ഷൗക്കത്തലി വെള്ളമുണ്ട, അബ്ദുല്ലത്തീഫ് വാഫി, നൗഫല്‍ മാസ്റ്റര്‍, നൗഷീര്‍ വാഫി, അബ്ബാസ് വാഫി, അബ്ദുല്ലത്തീഫ് അഞ്ചുകുന്ന്, നദീര്‍ മൗലവി സംസാരിച്ചു. സെക്രട്ടറി അയ്യൂബ് മാസ്റ്റര്‍ സ്വാഗതവും വര്‍ക്കിങ് സെക്രട്ടറി ഷാഹിദ് ഫൈസി നന്ദിയും പറഞ്ഞു.