തിരുവനന്തപുരം: അന്വേഷണം ദിവസങ്ങള്‍ പിന്നിട്ടിട്ടും തലസ്ഥാനത്തുനിന്ന് കാണാതായ ജര്‍മന്‍ യുവതി ലിസ വെയ്‌സിനെ (31) കുറിച്ച് പൊലിസിന് സൂചനയൊന്നും ലഭിച്ചില്ല. സമൂഹമാധ്യമങ്ങളില്‍ ഉള്‍പ്പെടെ ലുക്ക്ഔട്ട് നോട്ടിസ് പുറപ്പെടുവിച്ചിട്ടുണ്ടെങ്കിലും മൂന്നു ദിവസത്തിനപ്പുറമുള്ള വിശ്വസനീയമായ യാതൊരു വിവരവും ലഭിക്കാത്തത് പൊലിസിനെ കുഴക്കുകയാണ്. യുവതിക്ക് രൂപമാറ്റം സംഭവിക്കുകയോ, ഏതെങ്കിലും താവളങ്ങളില്‍ അകപ്പെടുകയോ ചെയ്തിട്ടുണ്ടോയെന്ന കാര്യവും അന്വേഷണത്തെ പ്രതിസന്ധിയിലാക്കുന്നുണ്ട്.

ലിസയോടൊപ്പം കേരളത്തില്‍ എത്തുകയും പിന്നീട് തിരികെ പോവുകയും ചെയ്ത യു.കെ സ്വദേശി മുഹമ്മദ് അലിയില്‍നിന്നും ലിസയുടെ കുടുംബാംഗങ്ങളില്‍നിന്നും വിവരങ്ങള്‍ തേടാന്‍ അന്വേഷണസംഘം ശ്രമം ആരംഭിച്ചു. എംബസിയുടെ സഹായത്തോടെ അറിയേണ്ട കാര്യങ്ങള്‍ ചോദ്യാവലിയായി തയാറാക്കി അവര്‍ക്കു കൈമാറും. മുഹമ്മദ് അലി തിരികെപ്പോയത് നെടുമ്പാശേരി വഴിയായതിനാല്‍ ലിസയും കൊച്ചിയിലെത്തിയോയെന്നും പരിശോധിക്കുന്നുണ്ട്. മുഹമ്മദ് അലിയെ കണ്ടെത്താന്‍ ഇന്റര്‍പോളിന്റെ സഹായവും തേടി. കേരളത്തില്‍ അമൃതപുരിക്ക് പുറമേ സായിബാബ ആശ്രമത്തിലും ഗോവയിലും സന്ദര്‍ശനം നടത്തണമെന്നാണ് യുവതിയുടെ യാത്രാ രേഖകളിലുള്ളത്.