വാഷിങ്ടണ്‍: യു.എസ് ഉപരോധം മറികടക്കാന്‍ യൂറോപ്യന്‍ യൂനിയന്റെ (ഇ.യു) നേതൃത്വത്തിലുള്ള പുതിയ പെയ്മന്റ് നീക്കവുമായി ഇറാന്‍. വ്യാപാരത്തില്‍ ഇറാനുമായുള്ള ബന്ധം തുടരാനാണ് യൂറോപ്യന്‍ യൂനിയന്റെ നേതൃത്വത്തില്‍ ബ്രിട്ടന്‍,ഫ്രാന്‍സ്, ജര്‍മനി, റഷ്യ, ചൈന എന്നീ അഞ്ച് രാജ്യങ്ങളുമായി ഇറാന്‍ പുതിയ കരാറില്‍ എത്തിച്ചേര്‍ന്നത്.
ഇറാനില്‍ നിന്നുള്ള എണ്ണ കയറ്റുമതി ഉള്‍പ്പെടെയുള്ള വ്യാപാരത്തിന്റെ സൗകര്യത്തിനായാണ് ഇത്തരമൊരു നീക്കം നടത്തിയതെന്ന് യൂറോപ്യന്‍ യൂനിയന്‍ വിദേശ നയതന്ത്ര മേധാവി ഫെഡ്രിക് മെഗാറിന്‍ പറഞ്ഞു. അഞ്ച് രാജ്യങ്ങളിലെ പ്രതിനിധികളുമായുള്ള കൂടിക്കാഴ്ചക്കു ശേഷമായിരുന്നു മെഗാറിന്റെ പ്രതികരണം.
പുതിയ പെയ്‌മെന്റ് സമ്പ്രദായത്തിലൂടെ ഇറാനുമായി സാമ്പത്തിക വിനിമയങ്ങള്‍ നടത്തുന്നതിന് ഇ.യു അംഗങ്ങള്‍ക്കു നിയമ സാധുത ലഭിക്കും. ഇതോടെ ഇ.യു നിയമം അനുസരിച്ച് അംഗരാഷ്ട്രങ്ങളിലെ കമ്പനികള്‍ക്ക് ഇറാനുമായി വ്യാപാരം നടത്താമെന്ന് അവര്‍ പറഞ്ഞു.
പ്രത്യേക ലക്ഷ്യത്തിനായി രൂപീകരിച്ച പെയ്‌മെന്റ് സമ്പ്രദായത്തിലൂടെ ഇറാനുമായുള്ള സാമ്പത്തിക ഇടപെടലുകള്‍ക്ക് സാധുതയുണ്ടാവുമെന്ന് ഇ.യു, റഷ്യ, ചൈന നടത്തിയ സംയുക്ത പ്രസ്താവനയില്‍ പറഞ്ഞു. ഇറാനുമായുള്ള ആണവ കരാറില്‍ നിന്ന് യു എസ് മെയില്‍ പിന്‍വാങ്ങിയിരുന്നു. ഇതിനെ തുടര്‍ന്ന് നവംബറില്‍ ഇറാനെതിരേ ഉപരോധം ഏര്‍പ്പെടുത്തുമെന്ന് യു എസ് പ്രഖ്യാപിച്ചിരുന്നു. ഇതിനിടെയാണ് ഇറാന്‍ ആണവ കരാറിലുണ്ടായിരുന്ന അഞ്ച് രാഷ്ട്രങ്ങള്‍ പുതിയ കരാറിന് രൂപം നല്‍കിയത്.