മുംബൈ: രാഷ്ട്രീയത്തിലേക്ക് പ്രവേശിക്കുന്നുവെന്ന സൂചന നല്‍കി സ്റ്റൈല്‍ മന്നന്‍ തമിഴ് സൂപ്പര്‍താരം രജനീകാന്ത് പ്രധാനമന്ത്രി മോദിയുമായി കൂടിക്കാഴ്ച നടത്താനൊരുങ്ങുന്നു. ഇതോടെ അദ്ദേഹം ബി.ജെ.പിയില്‍ ചേര്‍ന്നേക്കുമെന്ന അഭ്യൂഹം ശക്തമായി.
കഴിഞ്ഞ ശനിയാഴ്ച രജനീകാന്തിനെ ചില ബി.ജെ.പി നേതാക്കള്‍ ഫോണില്‍ ബന്ധപ്പെട്ടിരുന്നു. തുടര്‍ന്ന് അദ്ദേഹം മോദിയുമായി കൂടിക്കാഴ്ച നടത്തുമെന്ന് നേതാക്കള്‍ പ്രഖ്യാപിക്കുകയും ചെയ്തിട്ടുണ്ട്. അടുത്തയാഴ്ച്ചയായിരിക്കും കൂടിക്കാഴ്ച്ച.എന്നാല്‍ ബി.ജെ.പി നടത്തുന്ന അവകാശവാദത്തോട് ഇതുവരെ പ്രതികരിക്കാന്‍ രജനീകാന്ത് തയാറായിട്ടില്ല. താന്‍ ബി.ജെ.പിയില്‍ ചേരുമെന്നോ ഇല്ലെന്നോ വ്യക്തമാക്കാന്‍ അദ്ദേഹം തയാറാകാത്തത് യഥാര്‍ഥത്തില്‍ ആശങ്കപ്പെടുത്തുന്നത് ബി.ജെ.പി തമിഴ്‌നാട് സംസ്ഥാന ഘടകത്തെയാണ്. അതിനിടയില്‍ തമിഴ്‌നാട് ഭരണകക്ഷിയായ അണ്ണാ ഡി.എം.കെയിലെ ഇരുപക്ഷവും യോജിപ്പിലെത്തി ബി.ജെ.പി അനുകൂല നിലപാട് സ്വീകരിച്ചേക്കുമെന്ന പ്രതീക്ഷയും അവര്‍ വച്ചുപുലര്‍ത്തുന്നുണ്ട്.
മുന്‍മുഖ്യമന്ത്രി ഒ. പനീര്‍ശെല്‍വം പരാജിതനാണെന്നും മുഖ്യമന്ത്രി എടപ്പാടി പളനിസാമിക്ക് വ്യക്തമായ ചില പദ്ധതികളുണ്ടെന്നും വിലയിരുത്തുന്ന ബി.ജെ.പി, തമിഴ്‌നാട് രാഷ്ട്രീയത്തില്‍ സ്വാധീനമുറപ്പിക്കാന്‍ അണ്ണാ ഡി.എം.കെയിലെ ഇരുപക്ഷത്തെയും യോജിപ്പിക്കാനുള്ള ശ്രമവും തുടങ്ങിയിട്ടുണ്ട്.