കൊച്ചി: മുന്‍ കേരള ക്രിക്കറ്റ് താരം ഐവന്‍ ഡിക്രൂസിന് കേരള ക്രിക്കറ്റ് അസോസിയേഷന്‍ പ്രതിമാസം 10,000 രൂപ പെന്‍ഷന്‍ അനുവദിച്ചു. ഐവന്‍ ഡിക്രൂസിനെക്കുറിച്ച് വന്ന വാര്‍ത്തയെത്തുടര്‍ന്നാണ് കേരള ക്രിക്കറ്റ് അസോസിയേഷന്റെ ഈ നടപടി. ഇദ്ദേഹത്തിന്റെ ചികിത്സാ ചെലവുകള്‍ക്കായി കെ.സി.എ 7,000 രൂപ വീതം നല്‍കിയിരുന്നു. ചികിത്സാ ചെലവിന്റെ ബില്ലുകള്‍ നല്‍കുന്ന മുറയ്ക്കാണ് ഈ തുക നല്‍കിയിരുന്നത്. ബില്ലുകള്‍ സമര്‍പ്പിക്കാത്ത ചില മാസങ്ങളില്‍ ഇതിന് മുടക്കം വന്നിട്ടുണ്ട്. എന്നാല്‍ അദ്ദേഹത്തിന്റെ അവസ്ഥയെക്കുറിച്ചുള്ള വാര്‍ത്ത ശ്രദ്ധയില്‍പ്പെട്ടതിനെ തുടര്‍ന്ന് പ്രതിമാസം 10,000 രൂപ വീതം നല്‍കാന്‍ തീരുമാനിച്ചതായി കേരള ക്രിക്കറ്റ് അസോസിയേഷന്‍ സെക്രട്ടറി അഡ്വ. ശ്രീജിത്ത് വി. നായര്‍ വാര്‍ത്താക്കുറിപ്പില്‍ അറിയിച്ചു.