കുന്നുംകൈ: ഗതാഗതം ദുഷ്‌കരമായ മലയോരത്തെ പ്രധാന റോഡുകളിലൊന്നായ ചിറ്റാരിക്കല്‍ മണ്ഡപം-കുന്നുംകൈ റോഡിന്റെ രണ്ടാംഘട്ട പ്രവൃത്തിക്ക് ടെന്‍ഡറായി. രണ്ടര കിലോമീറ്റര്‍ റോഡാണ് രണ്ടാംഘട്ടത്തില്‍ നവീകരിക്കുന്നത്. നേരെത്തെ 1.6 കിലോമീറ്റര്‍ റോഡ് മെക്കാഡം ടാറിങ് നടത്തി ഗതാഗതയോഗ്യമാക്കിയിരുന്നു.
10.5 കിലോ മീറ്റര്‍ ആണ് ചിറ്റാരിക്കല്‍ മണ്ഡപം-കുന്നുംകൈ പാലം റോഡിന്റെ ദൂരപരിധി. ഇതിന്റെ ഏറ്റവും ഗതാഗത ദുരിതം പേറുന്ന ഭാഗമാണ് ആദ്യഘട്ടത്തില്‍ പൂര്‍ത്തിയാക്കുന്നത്. കാസര്‍കോട് വികസന പാക്കേജില്‍ ഉള്‍പ്പെടുത്തിയാണ് സര്‍ക്കാര്‍ തുക അനുവദിച്ചത്. നാലുകോടി രൂപയുടെ ടെന്‍ഡര്‍ നടപടിയാണ് ഇവിടെ പൂര്‍ത്തീകരിച്ചത്. 10 മീറ്റര്‍ വീതിയില്‍ അഞ്ചര മീറ്റര്‍ മെക്കാഡം ടാറിങ് രണ്ടര കിലോമീറ്റര്‍ ദൂരം പൂര്‍ത്തിയാക്കാനാണു കരാര്‍. ഇതില്‍ കോണ്‍ക്രീറ്റ്, മണ്‍ ഓവുചാല്‍, പൈപ്പ് കള്‍വര്‍ട്ടുകള്‍ എന്നിവയും നിര്‍മിക്കും.
മലയോരത്തെ പ്രധാന ടൗണുകളിലൊന്നായ ചിറ്റാരിക്കാലില്‍നിന്നു നഗരപ്രദേശങ്ങളിലേക്ക് എളുപ്പത്തില്‍ എത്തിച്ചേരാവുന്ന റോഡാണിത്. ഭീമനടി നീലേശ്വരം റോഡിനെ കുന്നുംകൈയില്‍നിന്നു ബന്ധിപ്പിക്കുന്ന ഈ റോഡില്‍ കൂടി നിരവധി ബസ് സര്‍വിസുകളടക്കം നൂറുകണക്കിനു വാഹനങ്ങള്‍ കടന്നുപോകുന്നുണ്ട്.
പലയിടത്തും റോഡ് തകര്‍ന്നതുമൂലം ഗതാഗതം ദുഷ്‌കരമായിരുന്നു. ഇതോടൊപ്പം അനുവദിച്ച മാങ്ങോട് എടത്തിലവളപ്പ് റോഡിന്റെ ആറുകോടി രൂപയുടെ പ്രവൃത്തിയുടെയും ടെന്‍ഡര്‍ അടുത്ത ദിവസം നടക്കും. രണ്ടാംഘട്ട നിര്‍മാണം പൂര്‍ത്തിയാകുന്നതോടെ ഇവിടങ്ങളിലെ ഗതാഗതം സുഖകരമാകും.