കോട്ടയം: മലങ്കര സഭാ തര്‍ക്കത്തില്‍ സുപ്രിംകോടതി വിധി നടപ്പാക്കുന്നതില്‍ സംസ്ഥാന സര്‍ക്കാരിന്റെ ഉത്തരവാദിത്വത്തെ ചൊല്ലിയും ഇരുവിഭാഗങ്ങളുടെ വാക്‌പോര്.
സര്‍ക്കാരിനെതിരേ ആഞ്ഞടിച്ച് ആദ്യം രംഗത്തെത്തിയത് ഓര്‍ത്തഡോക്‌സ് സഭാധ്യക്ഷന്‍ ബസേലിയോസ് മാര്‍ത്തോമ്മ പൗലോസ് ദ്വിതീയന്‍ കത്തോലിക്കാ ബാവായാണ്. പള്ളിത്തര്‍ക്കത്തില്‍ സര്‍ക്കാര്‍ വിധി നടപ്പാക്കുന്നതില്‍ വീഴ്ച വരുത്തിയെന്ന് പറഞ്ഞ കാത്തോലിക്കാ ബാവ ഓര്‍ത്തഡോക്‌സ് സഭയ്ക്ക് അനുകൂലമായ വിധി വന്നിട്ടും നടപ്പാക്കിത്തരേണ്ടവര്‍ അതു ചെയ്യുന്നില്ലെന്ന് കുറ്റപ്പെടുത്തി.
വിധി നടപ്പാക്കാന്‍ സര്‍ക്കാര്‍ അടിയന്തരമായി ഇടപെടണമെന്നും ബസേലിയോസ് പൗലോസ് ദ്വിതീയന്‍ കാതോലിക്ക ബാവ ആവശ്യപ്പെട്ടു.

കാത്തോലിക്കാ ബാവയുടെ പ്രസ്താവനയോട് പ്രതികരിച്ച യാക്കോബായ സഭയുടെ സുന്നഹദോസ് സെക്രട്ടറി തോമസ് തീമോത്തിയോസ് മെത്രാപ്പോലീത്ത സുപ്രിംകോടതിയില്‍നിന്ന് പള്ളിക്കേസുകളില്‍ ഉണ്ടായ വിധികള്‍ നടപ്പിലാക്കാന്‍ സിവില്‍ കോടതികള്‍ക്ക് മാത്രമേ സാധിക്കുകയുള്ളൂവെന്ന് പറഞ്ഞു.
ഇതിനു പിന്നാലെയാണ് കോടതി വിധിയുടെ പകര്‍പ്പുമായി ഓര്‍ത്തഡോക്‌സ് സഭാ വൈകിട്ടോടെ വാര്‍ത്താ കുറിപ്പിറക്കിയത്. മുഖ്യമന്ത്രിയുടെ പ്രസ്താവന മലങ്കര ഓര്‍ത്തഡോക്‌സ് സുറിയാനി സഭ സ്വാഗതം ചെയ്യുന്നുവെന്നും എന്നാല്‍ സുപ്രിംകോടതിവിധി നടപ്പിലാക്കാന്‍ യാതൊരു ഉപാധികളുമില്ലാതെ നിയമപരമായ നടപടി അവലംബിക്കുകയാണ് സര്‍ക്കാര്‍ ചെയ്യേണ്ടതെന്നും അസോസിയേഷന്‍ സെക്രട്ടറി അഡ്വ. ബിജു ഉമ്മന്‍ പ്രസ്താവിച്ചു.