നെടുമ്പാശ്ശേരി: ഈ വര്‍ഷത്തെ ഹജ്ജ് കര്‍മം പൂര്‍ത്തിയാക്കിയവരിലെ അവസാന സംഘവും ഇന്നലെ മടങ്ങിയെത്തി. പുലര്‍ച്ചെ 4.30നാണ് അവസാന സംഘം ഹാജിമാരുമായി എസ്.വി 5943 നമ്പര്‍ സഊദി എയര്‍ലൈന്‍സ് വിമാനം നെടുമ്പാശ്ശേരിയിലെത്തിയത്. ഈ മാസം 12 മുതലാണ് തീര്‍ഥാടകരുടെ മടക്കയാത്ര ആരംഭിച്ചത്.
നെടുമ്പാശ്ശേരി,തിരുവനന്തപുരം വിമാനത്താവളങ്ങളില്‍ നിന്ന് ജിദ്ദ വിമാനത്താവളം വഴിയാണ് തീര്‍ഥാടകര്‍ മക്കയിലെത്തിയത്. ഹജ്ജ് കര്‍മം പൂര്‍ത്തിയാക്കിയതിന് ശേഷമായിരുന്നു ഇവരുടെ മദീന യാത്ര. ഇതിനു ശേഷം മദീനയില്‍ നിന്നാണ് തീര്‍ഥാടകര്‍ നാട്ടിലേക്ക് മടങ്ങിയത്.
മന്ത്രി കെ.ടി.ജലീല്‍, ഇ.ടി.മുഹമ്മദ് ബഷീര്‍ എം.പി, ഹജ്ജ് കമ്മിറ്റി ചെയര്‍മാന്‍ സി.മുഹമ്മദ് ഫൈസി, മുന്‍ ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി, എം.എല്‍.എമാര്‍, ഹജ്ജ് കമ്മിറ്റി അംഗങ്ങള്‍ തുടങ്ങിയവരാണ് ഹാജിമാരെ സ്വീകരിച്ചത്.
ഈ വര്‍ഷത്തെ ഹജ്ജ് തീര്‍ഥാടനം വിജയകരമായി പൂര്‍ത്തീകരിക്കുന്നതിന് സഹകരിച്ച എല്ലാ സുമനസുകള്‍ക്കും നന്ദി രേഖപ്പെടുത്തുന്നതായി ഹജ്ജ് കമ്മിറ്റി ചെയര്‍മാന്‍ സി.മുഹമ്മദ് ഫൈസി പറഞ്ഞു. മടങ്ങിയെത്തിയ ഹാജിമാര്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കാന്‍ 25,03,138 രൂപ സമാഹരിച്ച് ഹജ്ജ് കമ്മിറ്റിയെ ഏല്‍പ്പിച്ചതായി ചെയര്‍മാന്‍ അറിയിച്ചു.