കോഴിക്കോട്: പ്രസാര്‍ഭാരതി രാജ്യമൊട്ടാകെ നടപ്പാക്കുന്ന ആകാശവാണി റീബ്രാന്‍ഡിങ് പദ്ധതിയുടെ ഭാഗമായി മലയാളത്തിലെ പ്രാദേശിക നിലയങ്ങള്‍ക്കെല്ലാം ചേര്‍ത്ത് ഒറ്റപ്പേര് നല്‍കി, 'ആകാശവാണി കേരളം'.
തിരുവനന്തപുരം, കോഴിക്കോട്, കണ്ണൂര്‍, ദേവികുളം, തൃശൂര്‍ നിലയങ്ങളാണ് ഇനി'ആകാശവാണി കേരളം' എന്ന പേരില്‍ അറിയപ്പെടുക.
രാജ്യത്തെ 85 പ്രാദേശിക നിലയങ്ങള്‍ 36 കേന്ദ്രീകൃത ബ്രോഡ്കാസ്റ്റിങ് സംവിധാനത്തിലേക്ക് മാറ്റുന്നതിന്റെ ഭാഗമായാണ് ഈ നടപടി. 2021 ജനുവരിയോടെ പുതിയ മാറ്റങ്ങള്‍ നടപ്പിലാക്കാനുള്ള ഒരുക്കത്തിലാണ് അധികൃതര്‍. പ്രാദേശിക നിലയങ്ങളുടെ പരിപാടികള്‍ ഷെഡ്യൂള്‍ ചെയ്യുന്നതിലും മറ്റും പുതിയ നിര്‍ദേശങ്ങളുമുണ്ട്.
മാറ്റങ്ങള്‍ വരുന്നതോടെ രാജ്യത്തെ ആകാശവാണിയുടെ പ്രാദേശിക നിലയങ്ങളെല്ലാം അതത് സംസ്ഥാനത്തെ കേന്ദ്രീകൃത ബ്രോഡ്കാസ്റ്റിങ് സംവിധാനം പ്രവര്‍ത്തിക്കുന്ന നിലയത്തിന്റെ സഹ സ്ഥാപനങ്ങളായി മാറും.
ഇതനുസരിച്ച്, സംസ്ഥാനത്ത് തിരുവനന്തപുരം നിലയമായിരിക്കും പ്രധാന കേന്ദ്രമായി പ്രവര്‍ത്തിക്കുക. മറ്റു നിലയങ്ങള്‍ തിരുവനന്തപുരത്തിന്റെ ഉപ സ്റ്റേഷനുകളാകും. തിരുവനന്തപുരം കേന്ദ്ര നിലയത്തില്‍ നിന്നുള്ള പരിപാടികള്‍ റിലേ ചെയ്യുക, കേന്ദ്ര നിലയത്തിലെ നിര്‍ദേശ പ്രകാരം പരിപാടികള്‍ റെക്കോര്‍ഡ് ചെയ്ത് അയച്ച് കൊടുക്കുക തുടങ്ങിയ ചുമതലകളാണ് ഉപകേന്ദ്രങ്ങള്‍ക്കുണ്ടാവുക. പുതിയ മാറ്റത്തോടെ അതത് പ്രദേശത്തെ പ്രാദേശിക പരിപാടികള്‍ ഇല്ലാതാവുകയും സംസ്ഥാനമാകെ ഒറ്റ പ്രക്ഷേപണം മാത്രമാവുകയും ചെയ്യും.
കോഴിക്കോട് നിന്ന് വിവിധ്ഭാരതിയുടെ കീഴിലുള്ള റിയല്‍ എഫ്.എം, തിരുവനന്തപുരത്ത് നിന്നുള്ള അനന്തപുരി എഫ്.എം എന്നിവയും 'ആകാശവാണി മലയാളം' എന്ന പേരില്‍ ഒറ്റ പ്രക്ഷേപണമാകും.
കൊച്ചിയിലെ പ്രാദേശിക റേഡിയോ സ്‌റ്റേഷനും റെയിന്‍ബോ എഫ്.എം സ്‌റ്റേഷനും മഞ്ചേരി എഫ്.എം സ്റ്റേഷനും 'റെയിന്‍ബോ എഫ്.എം' എന്ന പേര് സ്വീകരിക്കും. ചെലവു ചുരുക്കല്‍, മനുഷ്യവിഭവ ശേഷിയുടെ അഭാവം എന്നിവയാണ് പുതിയ മാറ്റങ്ങള്‍ക്ക് കാരണമെന്നാണ് പ്രസാര്‍ഭാരതിയുടെ വിശദീകരണം.