മലപ്പുറം: ഓണ്‍ലൈനിലൂടെയും കലോത്സവം സംഘടിപ്പിക്കാമെന്നു തെളിയിച്ചിരിക്കുകയാണ് ഒരുപറ്റം യുവതീ യുവാക്കള്‍. ഫോസ്ബുക് കൂട്ടായ്മയായ 'ദോസ്ത് ' ആണ് ഒന്നര മാസം നീണ്ടുനിന്ന  'യുവജനോത്സവ് ' പരിപാടി ഓണ്‍ലൈനിലൂടെ സംഘടിപ്പിച്ചത്. ലോകത്തിന്റെ വിവിധഭാഗങ്ങളില്‍നിന്നുള്ള നൂറുകണക്കിനു മലയാളികള്‍ മത്സരങ്ങളില്‍ പങ്കെടുത്തു കഴിവുകള്‍ തെളിയിച്ചു.
അയ്യായിരത്തോളം അംഗങ്ങളുള്ള 'ദോസ്ത് ' രണ്ടു വര്‍ഷംമുന്‍പാണ് ക്രിയേറ്റ് ചെയ്തത്. ഇടയ്ക്കിടെ വിവിധ മത്സരങ്ങള്‍ സംഘടിപ്പിച്ചുകൊണ്ടിരുന്ന അഡ്മിന്‍സ് ഗ്രൂപ്പ് അംഗങ്ങളുടെ അഭിരുചി കണ്ടെത്തി അതു വളര്‍ത്തിയെടുക്കുന്നതിന്റെ ഭാഗമായി ഓണ്‍ലൈനിലൂടെ 'യുവജനോത്സവ് ' എന്ന ആശയത്തില്‍ എത്തുകയായിരുന്നു. ഗ്രൂപ്പിലൂടെതന്നെയാണ് പരിപാടിയുടെ പ്രഖ്യാപനം നടത്തിയത്. പരിചയപ്പെടുത്തല്‍, ചെറുകഥ, ഇഷ്ടഗാനം, ക്വിസ്, മാപ്പിളപ്പാട്ട്, കവിതാ രചന, മാലപ്പാട്ട്, സെല്‍ഫി, ട്രോള്‍, മിമിക്രി, ലൈവ് പ്രോഗ്രാം തുടങ്ങി 13 ഇനങ്ങളിലായിരുന്നു മത്സരം.
മത്സരാര്‍ഥികളെ എട്ടു ഗ്രൂപ്പുകളായി തിരിച്ചിരുന്നു. ലോകത്തിന്റെ വിവിധ കോണുകളിലുള്ളവര്‍ ലൈവായും അല്ലാതെയും മത്സരങ്ങളില്‍ പങ്കെടുത്തു. ഓണ്‍ലൈന്‍വഴിതന്നെ വിലയിരുത്തിയ ശേഷമാണ് വിധികര്‍ത്താക്കള്‍ ജേതാക്കളെ തെരഞ്ഞെടുത്തത്. അനസ് ആന്‍സ് കൊയിലാണ്ടി, അഷ്‌റഫ് പട്ടാമ്പി, മിര്‍ഷാദ് അല്‍ഹിലാല്‍, സൈറ ഷാഫി, അഷ്‌റഫ് ജെ.വി, നിജാസ് ടി. ജാസ്, നസീഹ സജീര്‍ എന്നിവരാണ് അണിയറ പ്രവര്‍ത്തകര്‍.