മട്ടന്നൂര്‍: കനത്ത കാറ്റിലും മഴയിലും മട്ടന്നൂര്‍ മേഖലയില്‍ കനത്ത നാശം. മട്ടന്നൂര്‍ പാലോട്ടുപള്ളിയില്‍ മരം കടപുഴകി വൈദ്യുതലൈനില്‍ വീണതോടെ പോസ്റ്റ്‌പൊട്ടി ജീപ്പ് യാത്രികര്‍ അപകടത്തില്‍പെട്ടു. സംഭവത്തില്‍ അന്യസംസ്ഥാന തൊഴിലാളിയായ അഖിലേഷി(28)ന് പരുക്കേറ്റു. ശക്തമായ കാറ്റും മഴയും കാരണം പതുക്കെ പോവുകയായിരുന്ന ജീപ്പിന് മുകളില്‍ മരവും വൈദ്യുത പോസ്റ്റും വീഴുകയായിരുന്നു. മട്ടന്നൂര്‍ ഹയര്‍ സെക്കന്‍ഡറിക്കും പാലോട്ടുപള്ളിക്കും ഇടയില്‍ ഇന്നലെ വൈകുന്നേരമാണ് സംഭവം. ജീപ്പിന്റെ ബോണറ്റിനു മുകളിലാണ് മരം വീണത്. പുറകിലിരുന്ന യാത്രികര്‍ തെറിച്ച് മുന്നിലേക്ക് വീണു. ചാവശേരി നടുവനാട്ടേക്ക് പോകുന്ന ജീപ്പാണ് അപകടത്തില്‍പ്പെട്ടത്. ജീപ്പില്‍ അഞ്ച് പേര്‍ ഉണ്ടായിരുന്നു.
മറ്റുള്ളവര്‍ക്ക് നിസാര പരിക്കേറ്റു. അപകടത്തെ തുടര്‍ന്ന് ഒരു മണിക്കൂറോളം ഗതാഗതം തടസപ്പെട്ടു. മട്ടന്നൂര്‍ ഫയര്‍ ഫോഴ്‌സും പൊലിസും നാട്ടുകാരും ചേര്‍ന്ന് രക്ഷാപ്രവര്‍ത്തനം നടത്തി. ചാവശേരി കാശി മുക്കില്‍ ശക്തമായ കാറ്റില്‍ മരം പൊട്ടിവീണ് വൈദ്യുത ലൈന്‍ പൊട്ടിവീണു. കാശിമുക്ക് ക്ഷേത്രത്തിനു സമീപമാണ് അപകടം. മട്ടന്നൂര്‍ ഇരിട്ടി റോഡില്‍ കെ.എസ്.ടി.പി റോഡു പണി നടക്കുന്നതിനാല്‍ മിക്കയിടത്തും റോഡ് മുറിച്ചതോടെ ചെളിക്കുളമായ അവസ്ഥയിലാണ്. കനത്ത മഴയില്‍ താഴ്ന്ന പ്രദേശങ്ങള്‍ വെള്ളത്തിലായി. വൈകുന്നേരത്തോടെ പെയ്ത കനത്ത കാറ്റിലും മഴയിലും പ്രദേശത്തെ ഇരുട്ടിലുമാക്കി.