തിരുവനന്തപുരം: കേരളത്തില്‍ വീണ്ടും വാനാക്രൈ വൈറസ് ആക്രമണം. തിരുവനന്തപുരം റെയില്‍വേ ഡിവിഷന്‍ ഓഫിസിലാണ് ഇന്ന് വാനക്രൈ റാന്‍സംവെയര്‍ വൈറസിന്റെ ആക്രമണമുണ്ടായത്.

ആക്രമണത്തെത്തുടര്‍ന്ന് അക്കൗണ്ട്‌സ് വിഭാഗത്തിലെ നാല് കംപ്യൂട്ടറുകളും ടെക്‌നിക്കല്‍ വിഭാഗത്തിലെ ഒരു കംപ്യൂട്ടറും തകരാറിലായി. തുടര്‍ന്ന് ഇവിടുത്തെ നെറ്റ്‌വര്‍ക്ക് ഓഫ് ചെയ്തു.

എന്നാല്‍, പൊതുജനങ്ങളുമായി ബന്ധപ്പെട്ട സേവനങ്ങള്‍ക്ക് തടസമുണ്ടാകില്ലെന്നും ഇത്തരം കംപ്യൂട്ടറുകളില്‍ ആക്രമണം നടത്തിയിട്ടില്ലെന്നും റെയില്‍വേ അധികൃതര്‍ അറിയിച്ചു. നേരത്തെ പാലക്കാട് റെയില്‍വേ ഡിവിഷന്‍ ഓഫിസിലെ കമ്പ്യൂട്ടറുകളെയും വൈറസ് ബാധിച്ചിരുന്നു.