കോഴിക്കോട്: എസ്.ബി.ഐയുടെ ജനദ്രോഹ നടപടികള്‍ അവര്‍ക്കുതന്നെ വിനയാകുന്നു. ജനങ്ങളെ പരമാവധി ബാങ്കില്‍നിന്ന് അകറ്റുന്നതും പ്രയാസങ്ങളുണ്ടാക്കുന്നതുമായ നയങ്ങളാണ് കുറച്ചു കാലമായി ബാങ്ക് തുടരുന്നത്. എസ്.ബി.ഐ ബാങ്കില്‍ അക്കൗണ്ടില്ലാത്തവര്‍ക്ക് എസ്.ബി.ഐയുടെ മറ്റ് ശാഖകളില്‍ പണം നിക്ഷേപിക്കാന്‍ കഴിയില്ലെന്ന പുതിയ നയമാണ് ജനങ്ങള്‍ക്ക് കുരിശായിരിക്കുന്നത്. പുതിയ ഉത്തരവ് ഉപഭോക്താക്കളെ ബാങ്കുകളില്‍നിന്ന് അകറ്റുകയാണ്.
എസ്.ബി.ഐ പുതുതായി ഇറക്കിയ ഉത്തരവിന്റെ ഭാഗമായാണ് എസ്.ബി.ഐ ബാങ്കില്‍ അക്കൗണ്ടില്ലാത്തവര്‍ക്ക് മറ്റൊരാളുടെ അക്കൗണ്ടില്‍ പണം അടയ്ക്കാന്‍ സാധിക്കാത്തത്. ഇതോടെ എസ്.ബി.ഐ അക്കൗണ്ടിലേക്ക് പണമിടുന്നത് കുറയുന്നതായാണ് റിപ്പോര്‍ട്ട്.ഇതര സംസ്ഥാന തൊഴിലാളികള്‍ ഉള്‍പ്പെടെ ഇടപാടുകാര്‍ മറ്റു ബാങ്കുകളിലേക്ക് ആകര്‍ഷിക്കപ്പെടുകയാണ്.
രേഖകളില്ലാത്ത പണം തടയാന്‍ പുതിയ നിയമം സഹായകമാവുമെന്നാണ് ബാങ്ക് അവകാശപ്പെടുന്നത്. എസ്.ബി.ഐയുടെ ഏതെങ്കിലും ശാഖയില്‍ അക്കൗണ്ടുള്ള വ്യക്തിയാണെങ്കില്‍ ഉടമയുടെ അക്കൗണ്ട് നമ്പര്‍ സ്ലിപ്പില്‍ എഴുതി നല്‍കണം. പുതിയ ഉത്തരവ് പ്രാബല്യത്തില്‍ വന്നത് അറിയാതെ നിരവധി പേരാണ് എസ്.ബി.ഐ അക്കൗണ്ടില്‍ പണം അടയ്ക്കാന്‍ സാധിക്കാതെ മടങ്ങുന്നത്. അക്കൗണ്ടില്‍ നേരിട്ട് പണമായി നിക്ഷേപിക്കുന്നതിന് മാത്രമാണ് ഈ നിയമം ബാധകം.
ഇന്റര്‍നെറ്റ് ബാങ്കിങ് വഴിയോ സി.ഡി.എം (ക്യാഷ് ഡെപ്പോസിറ്റ് മെഷീന്‍) വഴിയോ മറ്റ് ശാഖകളിലേക്ക് പണം അയക്കുന്നതിന് പ്രയാസമില്ല. എന്നാല്‍ സി.ഡി.എമ്മുകള്‍ ആവശ്യത്തിനില്ലാത്തതും മറ്റൊരു ദുരിതമാണ്. ഉള്ള സ്ഥലങ്ങളില്‍ ആളുകളുടെ നീണ്ട നിരയാണ് കാണുന്നത്.